Kəşf et

Şagird olmağın qiyməti

14:25 İsa ilə birlikdə çoxlu adam Yerusəlimə tərəf yol gedirdi. İsa dönüb onlara dedi: 26 «Mənim yanıma gələn, amma ata-anasını, arvad-uşaqlarını, bacı-qardaşlarını, yaxud öz həyatını Məndən üstün tutan adam Mənim şagirdim ola bilməz. 27 Öz çarmıxını daşıyıb ardımca gəlməyən kəs də Mənim şagirdim ola bilməz.

28 Deyək ki, sizlərdən biri qüllə tikmək istəyir. O, hökmən əvvəlcə oturub xərclərini hesablayır ki, görsün, onu tikib qurtarmaq üçün pulu çatacaq, ya yox. 29 Axı qüllənin təməlini qoyub işi qurtara bilməsə, ətrafdakılar onu ələ salıb deyəcək: 30 “Bu adam tikintiyə başladı, amma onu qurtara bilmədi”.

31 Yaxud da deyək ki, bir padşah başqa padşahın üstünə savaşa gedir. O da əvvəlcə götür-qoy etməlidir ki, görsün, on min əsgərlə düşmənin iyirmi min əsgərinin öhdəsindən gələ biləcəkmi? 32 Əgər bu padşah bunu edə bilməyəcəksə, düşmən padşah hələ uzaqda ikən qasid göndərib onunla sülh bağlamaq istəyər. 33 Beləcə, siz də əvvəldən bilməlisiniz ki, Mənim ardıcılım olmaq üçün hər şeyinizdən keçməlisiniz. Bunu etməyən əsla Mənim şagirdim ola bilməz.