Kəşf bıkə

İsa qınon baxşeydə iyən şifo doydə

5:17 Ruji İsa təlim omuteydəbe. Çe Qalileyə iyən Yəhudeyə har diyo, həmən Yerusəlimo omə, Bəy quş doəkəson arədə fəriseyon iyən Tovrati mıəllimon nıştəbin. Kulli-İxtiyori ğudrət şifo doyro de İsabe.

18 Bı vaxt kali odəmon vardışone yonqoədə bıə, iflicə odəm, dastpoçə bin ki, əy biyən, bınən İsa vədə. 19 İzdihomi qorə nıznəşone çoknə bıkən, peşin bə kəy kum, oçınişone kamişə vırə, çəvırəo eğandışone əv yonqo dılədə bə kəy miyonə, noşone İsa navədə. 20 Əy vindışe çəvon imon, votışe: «Çımı boə, baxşə bin ıştı qınon». 21 Ruhani mıəllimon iyən fəriseyon dəmandin jıqo fikir karde, votışone: «Kufr kardə ım odəm kiye? Ki baxşe bəzıne odəmi qınon, ğərəyz Xıdo?» 22 İsa zınəşe çəvon fikron, votışe bəvon: «Boçi jəqo şıneydəşon ıştə dılədə? 23 Kon sıxani vote hostone? “Iştı qınon baxşə beydən” votey, yaanki “Bəşt, bıpo!” 24 Əmma şımə bızınən ki, Bəşəri Zoə səlohiyət heste zəmini dimisə qınon bıbaxşı», çəyo votışe bə iflici: «Bətı voteydəm bəşt, peqət ıştə lef-sənqo bışi bəştə kə!» 25 Ə odəm dərhol həmməy vədə əşte səpo, peqətışe ıştə lef-sənqo, bə Xıdo şukur karde-karde şe bəştə kə. 26 Cəmat həmməy hədəyon mandin, şukur kardışone bə Xıdo iyən tarsi dılədə votışone: «Imruj mecuzəynə koon vindımone!»