Kəşf bıkə

Xıdmət kardəkəs həmməysə başe

20:20 Bəvədə Zavdayi zoon moə deştə zoon, Yağub iyən Yəhya ivrədə nez bin bə İsa, səcdə kardışone, Çəyku çiysə piyəşone. 21 İsa parsəy jeniku: «Çiçı piyeydə?» Jeni votışe Bəy: «Bıvot, bıdə çımı ım dıqlə zoə Iştı Podşoətiədə qıləyni Iştı rostədə, qıləyniən çəpədə bınıştı». 22 Əmma İsa cəvob doşe: «Iştənən zıneydənişon çiç piyeydone. Çımı peşomə əzobi piyoləo şımənən peşome bəzıneşon?» Çımı vəftiz be ğəzinə şımənən vəftiz be bəzıneşon? Əvon votışone: «Bəzınemon». 23 İsa votışe bəvon: «Şımənən peşome bəzıneşon Çımı peşomə piyoləo. Əmma Çımı rostədə, yaanki çəpədə nışteyro icozə doy çımı ko ni. Çımı Pıə bo kom odəmon hozı kardəşebu ə vırə, bəvonən doə bəbe».

24 Əmandə da qılə şoqird ımi məsəşe çəvon rık oməy bə dıqlə boə. 25 Bəvədə İsa sədo kardışe şoqirdon ıştə tono, votışe: «Zıneydəşon ki, çe milləton rəhbəron hıkmronəti kardeydən çəvon səpe iyən əğəti kardeydən bəvon. 26 Bıdə jıqo nıbu şımə arədə. Şımənədə ki piyeydəşe yol bıbu həmməy səpe, bıdə əv xıdmətəvon bıbu bo həmməy. 27 Şımə arədə iminə be piyəkəs, bıdə ğul bıbu bo əmandəyon. 28 Jıqoən, Bəşəri Zoə noməy ki, Bəy xıdmət bıkən, oməy ki, Iştən xıdmət bıkə iyən veyə odəmon hıriyeyro fidyə bıdə Iştə coni».