Kəşf bıkə

Çe İsa şoqird bey boho

14:25 Yolə izdihom şeydəbe de İsa bə ico. Əv odyəsəy votışe bəvon: 26 «Çımı tono omə, Mıni ıştə pıəsə, moəsə, jenisə, əğılonsə, boonsə, hovonsə, həmən ıştə jimonisə vey nıpiyəkəs Çımı şoqird be əzıni. 27 Iştə çomexi penıqətə Çımı dumo oməkəs, Çımı şoqird be əzıni.

28 Qirəm şıməhon qıləyni qıləy ğullə eje piyeydəşbo, bəqəm əv sıftəku hisob nıbəkarde ıştə xarci, vəs bəkarde boçəy sə karde, ya ne? 29 Jəqo nıbo, bınəçə ekardə həmon şəxs bə sə jəy əzıni ə koy. Imi vindəkəson pebəsıren bəy, 30 bəvoten: “Imha, ım odəm dəmande bo dute, əmma sə karde nıznəşe!”

31 Jəqoən bə co podşo vəynə bə canq şeyro beşə podşo sıftə nıştənine, çok-çoki no-peqət kardənine ki, əv deştə da həzo ləşğəri, dave karde bəzıne de vist həzo sərbozış bıə podşo ləşğəri, ya ne? 32 Madəm ki əzıni, əve bəvığande ıştə daynon, çanə ə qılə podşo hələ diyəroye, əjo bəkarde ki, sulh dəbastın. 33 Jıqoən, şıməhon har qıləyni ıştə heste-niku dast nıkəşo, Çımı şoqird be əzıni.