Kəşf bıkə

Məsihi xıdmətəvon

15:14 Çımı imoniyə boon, az şımə barədə xatırcəmim ki, şımə de çokiəti purişon, de har curə zınəy mıkəmməl bıəşon iyən bə iyəndı nəsyət doy bəzıneşon. 15 Əmma çe Xıdo bəmı lutf doə kali məsəlon bəşmə yod dənoyro ciqə kardıme ki, ın sıxanon bəşmə bınıvıştım. 16 Bə həmonə lutfiro az bo co milləton çe Məsih İsa xıdmətəvon bim ki, qıləy kahini ğəzinə çe Xıdo Şoyə Xəbə vəz bıkəm iyən co milləton de Mığəddəsə Rufi təğdis kardə bıbun, loyiğə təğdim bıbun bo Xıdo. 17 De jıqoy, az bə İsa Məsihi aid bıə bənə qıləy insoni bə Xıdo deştə kardə xıdməti fəxr karde bəzınem. 18 Az ciqə kardeydənim çiçsə co qıləy çiy bıvotım, ğərəyz Məsihi deçımı vositə kardəyon. Əy co milləton bə itoət vardeyro çımı sıxanon, əməlon, 19 əloməton iyən xariqon de Mığəddəsə Rufi ğudrəti oko doşe. Jıqoən, az dəmandim Yerusəlimo detobə İllirikum viloyəti Məsihi Şoyə Xəbə pevılo karde. 20 Az hejo cəhd kardıme ki, Məsihi nomi nıməsə vıronədən Şoyə Xəbə pevılo bıkəm, co kəson noə bınəçə səpe bina nıdutım. 21 Əmma çoknə ki Mığəddəsə Nıvıştəyonədə votə beydə:
«Çəy barədə bexəbə bıəkəson Əy bəvinden,
Nıməsəkəson səbərəsen».

Pauli bə Romə şey orzu

22 Çımı xıdmət çan kərə bəmı ənqəl be, əve az şımə tono ome nıznəym. 23 Esət həni həmon viloyətonədə ıştə koy bə sə jəme, çandə soron orzu kardəbim şımə tono bomem, umudəvovom ki, ın orzu bə vırə bərəse.