Kəşf bıkə

İsa qınokorə jeni baxşeydə

7:36 Fəriseyon qıləyni dəvət kardışe İsa bo harde. İsa oməy bə fərisey kə, dəvarde nışte surfə kəno. 37 Imha, şəhrədə bənə qınokori məşhur bıə qıləy jen, zıneədə ki, İsa fərisey kədə xorək hardeydə, vardışe əyo qıləy de xoşbuyə ruyəni purə mərmərə sərınc. 38 Jen mande İsa lınqon tono, bəme-bəme dəmande çəşə arson ru karde Çəy lınqonsə. Əv dəmande mole deştə muyon Çəy lınqon, maçə kardışe Bəçəy lınqon iyən dəsuşe xoşbuyə ruyən.

39 İsa bəştə kə dəvət kardə fərisey ımi vindeədə votışe ıştən-bəştə: «Əqər ım inson peyğəmbər bəbəy, əzni ki, Bəy pexəviyəkəs kiye iyən çoknə jene, oxo ım jen qınokore». 40 İsa jıqo ovardışe bəy: «Simon, az piyeydəme jıçiy bıvotım bətı». Əyən votışe: «Bıvot, Ustod».

41 İsa dəmande qəp jəy: «Dıkəsi ğarz hestbe bə qıləy sələm doəkəsi. İ kəsi pencsa, ə qıləyni isə penco dinar. 42 Çəvon nıbeşone bo ğarzi oqırdıniye hiçiy, sələm doəkəsi baxşəşe dıyninən. Esə çımonədə kom qılə vey bəpiyeşe əv?» 43 Simoni cəvob doşe: «Şıneydəm, ə odəm ki bəy vey baxşə be». İsa votışe bəy: «Tı rostə cəvobı doy». 44 Peşo İsa odyəsəy bə jeni tərəf, votışe bə Simoni: «Tı vindeydəş ım jeni? Az oməym bəştı kə, tı hiç ov nıdoy Bəmı bo Çımı lınqon şıştey. Im jen esə boy dəxısnişe deştə çəşi arsi Çımı lınqon iyən moləşe deştə muyon. 45 Tı maçə nıjəy Bəmı, ım jen esə boy bə kə dəşə vaxtiku Bəçımı lınqon maçə jəydə. 46 Tı bəçımı səy zeytunə ruyən dənısuyey. Əy isə Bəçımı lınqon xoşbuyə ruyən dəsuşe. 47 Bı səbəb voteydəm bətı: çəy vey bıə qınon baxşə bin, əve vey piyeydəşe. Bə ə odəmi ki, kam baxşə beydə, əy kamən piyeydəşe».

48 Çəyo İsa votışe bə jeni: «Iştı qınon baxşə bin». 49 Əmma surfə kəno bıəkəson ıştə arədə votışone: «Əv kiye ki, hətto qınon baxşeydə?» 50 İsa esə boy votışe bə jeni: «Iştı imoni peroxnişe tı, de sulhi bışi».