Kəşf bıkə

Beinsofə ğuli məsəl

18:21 Bəvədə Peter oməy parsəy İsaku: «Ya Kulli-İxtiyor! Qirəm çımı boə bəçımı vəynə qıno bıko, az çan kərə baxşəninim əy? Tosə haft kərə?» 22 İsa cəvob doşe bəy: «Tosə haft kərə ne, hətto hafto kərə haft, voteydəm bətı.

23 Jıqoən, Osmoni Podşoəti bımi oxşeydə: qıləy podşo piyeydəşe həx-hisob bıkə deştə ğulon. 24 Əv dəmande bo həx-hisob karde, vardə be çəy tono da həzo talanta ğarzış bıə i kəs. 25 Əmma çəy nıbeşe qıləy çiy bıdə, əğə əmr kardışe ki, bəhvatın əy iyən çəy jeni, çəy əğılon iyən çəy həmə hestı-ni, bıdən çəy ğarzi. 26 Bəvədə ğul dəqıniye bəçəy po iyən de ehtiromi votışe: “Səbr bıkə! Az bədom bətı həmə ğarzi”. 27 Əğə rəhmış oməy bə ğuli, vadoşe əv iyən baxşəşe çəy ğarz.

28 Əncəx həmonə ğul beşe bə kəno, pəydo kardışe bəy sa dinarb ğarzxo bıə ıştə qıləy co ğulə həmro. Eqətışe əv “Bıdə ıştə ğarzi!” votışe, dəmande əy bo tosniye. 29 Ğul dəqıniye bəçəy po, lovə kardışe bəy: “Səbr bıkə, bədom ıştı ğarzi”. 30 Əmma ım ğul rozi nıbe. Şe, doşe əv bə zindon dəğande tosə ıştə ğarzi səy. 31 Co ğulon vindeədə ın hodisə vey ğəmqin bin, şin, qəp jəşone həmmə bıəyon bo əğə.

32 Bəvədə əğə sədo kardışe ıştə tono ə ğul, votışe: “Ha bevəcə ğul, baxşıme bətı ıştı həmə ğarz, çumçıko tı lovə karde bəmı. 33 Bəqəm tı nəzniş baxşe ıştə həmro, çoknə az baxşəme tıni?” 34 Çəy əğə ğəzəbnok be, təslim kardışe əv bə cəzo doəkəson dast, detosə ıştə ğarzi həmməyəvo doə vaxti. 35 Qirəm şımə dılisıxto nıbaxşon ıştə boon qınon, Çımı Osmoni Pıən jıqo rəftor bəkarde deşmə».