Kəşf et

Farisey və vergiyığanın məsəli

18:9 İsa bir məsəl də çəkdi ki, bu məsəl özlərini saleh sayıb, başqalarına xor baxan adamlara aid idi. 10 O, sözünə başladı: «Bir gün iki nəfər dua etmək üçün məbədə gəldi. Onlardan biri farisey, o biri isə vergiyığan idi. 11 Farisey ayaq üstə dayanıb öz-özünə belə dua etdi: “İlahi, Sənə şükür edirəm ki, mən soyğunçu, başqasının haqqını yeyən, zinakar adamlar kimi deyiləm. Ya da bu vergiyığan kimi günahkar da deyiləm. 12 Həftədə iki gün oruc tuturam, qazancımın onda bir hissəsini də məbədə verirəm”. 13 Vergiyığan isə küncə sıxılmışdı, başını qaldırmağa da cəsarət etmirdi. Elə hey sinəsinə vurub deyirdi: “Ay Allah, mən günahkara rəhm et!” 14 Əmin olun ki, farisey yox, vergiyığan evinə bəraət alaraq getdi. Bilin ki, özünü yüksəyə qaldıran adam aşağı tutulacaq, özünü aşağı tutansa yüksəyə qaldırılacaq».

İsa uşaqlara xeyir-dua verir

15 Bəzi adamlar balaca uşaqlarını İsanın yanına gətirirdilər ki, onlara toxunub xeyir-dua versin. Bunu görən şagirdlər onlara mane olmağa çalışdılar. 16 Amma İsa uşaqları yanına çağırıb dedi: «Buraxın uşaqları, qoy Mənim yanıma gəlsinlər! Onlara mane olmayın! Allahın Padşahlığı belələrinə məxsusdur. 17 Əmin olun ki, kim Allahın Padşahlığını bir uşaq kimi qəbul etmirsə, oraya əsla girə bilməz».