Kəşf et

İsa və Zakkay

19:1 İsa Yerixo şəhərinə gəldi. O, şəhərin içindən keçirdi. 2 Orada Zakkay adlı bir adam var idi. Bu adam vergiyığanların rəisi idi. 3 O, İsanı görmək istəyirdi, amma boyu qısa olduğuna görə izdihamın arasında Onu görə bilmirdi. 4 Onda İsanı görmək üçün adamlardan qabaqca qaçıb bir yabanı əncir ağacına dırmaşdı. Bilirdi ki, İsa o yerdən keçəcək.

5 İsa o yerə çatdıqda yuxarı baxaraq onu gördü və dedi: «Ey Zakkay, tez aşağı düş. Bu gün Mən sənin evində qalmalıyam». 6 O, tez aşağı düşüb İsanı sevinclə evinə dəvət etdi. 7 Camaat bunu görəndə narazılıq etməyə başladı: «Gedib bu cür günahkar adama qonaq oldu!» 8 Zakkay evində ayağa qalxıb dedi: «Ağa, mal-dövlətimin yarısını yoxsullara verirəm və kimə haqsızlıq edib malını əlindən almışamsa, ona dörd qat qaytaracağam». 9 İsa onun cavabında dedi: «Bu gün Allah bu evə xilas bəxş etdi, axı bu adam da İbrahimin övladıdır. 10 Bilin ki, Mən, Bəşər Oğlu, itmiş olanları axtarıb xilas etmək üçün gəlmişəm».