موندل

^١ بيا خُدائ پاک کلام وکړو او هغه ټولې خبرې دا دى: ^٢ ”زۀ مالِک خُدائ، ستاسو خُدائ پاک يم چا چې تاسو د مِصر د مُلک نه راوويستلئ، کوم چې د غلامۍ مُلک وو. ^٣ زما نه بغېر د نورو معبودانو عِبادت مۀ کوئ. ^٤ د خپلو ځانونو دپاره بُتان مۀ جوړوئ، د داسې يو څيز په شکل هم نه چې هغه پاس په آسمان کښې وى يا په زمکه وى يا که هغه د زمکې لاندې په اوبو کښې وى. ^٥ يو بُت ته هم چې سجده ونۀ لګوئ او نه يې عِبادت وکړئ، ځکه چې زۀ مالِک خُدائ، ستاسو خُدائ پاک يو غيرتى خُدائ يم. زۀ هغه خلقو او د هغو اولادونو له د دريم او څلورم نسل پورې سزا ورکوم څوک چې زما نه کرکه کوى. ^٦ خو زۀ د هغه خلقو زرګونو نسلونو ته خپله نۀ بدلېدونکې مينه ښايم څوک چې زما سره مينه لرى او زما حُکمونه منى. ^٧ زما نوم د غلطو مقصدونو دپاره مۀ اِستعمالوئ، ځکه چې زۀ، مالِک خُدائ، ستاسو خُدائ پاک به هغه چا له سزا ورکوم څوک چې زما نوم بې‌فائدى اخلى. ^٨ د سبت ورځ ياده لرئ او دا مقدسه ګڼئ. ^٩ په شپږو ورځو کښې تاسو خپل کار روزګار کوئ، ^١٠ خو اوومه ورځ د آرام ورځ ده چې ما ته وقف ده. په هغه ورځ به هيڅ څوک کار روزګار نۀ کوى، نه تاسو، نه ستاسو بچى، نه ستاسو غلامان، نه ستاسو څاروى او نه هغه مسافر کوم چې ستاسو سره اوسېږى. ^١١ په شپږو ورځو کښې ما يعنې مالِک خُدائ زمکه، آسمان، سمندر او په دې کښې چې هر څۀ هم دى جوړ کړل، خو په اوومه ورځ ما آرام وکړو. نو دا ځکه ما مالِک خُدائ د سبت ورځې له برکت ورکړو او مقدسه مې کړه. ^١٢ د خپل مور او پلار عزت کوئ، نو تاسو به په هغه مُلک کښې يو اوږد عمر تېر کړئ کوم چې درکوم. ^١٣ قتل مۀ کوئ. ^١٤ زنا مۀ کوئ. ^١٥ غلا مۀ کوئ. ^١٦ د چا خِلاف د دروغو ګواهى مۀ ورکوئ. ^١٧ د خپل ګاونډى د کور خواهِش مۀ کوئ، د هغۀ د ښځې، د هغۀ د نوکرانو، د هغۀ د څاروو، خرونو او د هغه يو شى خواهِش هم مۀ کوئ کوم چې ستاسو د ګاونډى وى.“

^١٨ چې کله خلقو د تندرونو او د بيګل آواز واورېدو او برېښناګانې او د غرۀ لوګى يې وليدل، هغوئ د يرې نه ولړزېدل او لرې ودرېدل. ^١٩ هغوئ موسىٰ ته ووئيل، ”که تۀ زمونږ سره خبرې کوې نو مونږ به ورته غوږ ونيسو، خو که خُدائ پاک زمونږ سره خبرې وکړې نو مونږ يرېږُو چې مړۀ به شو.“ ^٢٠ موسىٰ ورته ووئيل، ”يرېږئ مه، خُدائ پاک خو صِرف دې له راغلے دے چې تاسو وآزمائ او خپله يره ستاسو په زړونو کښې واچوى چې تاسو ګناه نۀ کوئ.“ ^٢١ خو خلق هم هغه شان لرې ولاړ وُو او صِرف موسىٰ هغه تکې تورې تيارې له نزدې ورَغلو چرته چې خُدائ پاک وو.