Kəşf bıkə

Dınyo ofəyə be

1:1 Sıftə Xıdo ofəyəşe osmonon iyən zəmin. 2 Zəmin besoxtemon iyən təybe. Toyki hestbe nığılə ovon səpe. Xıdo Ruf pərvoz kardeydəbe ovon səpe.

3 Xıdo votışe: «Bıdə ruşnə bıbu», ruşnə be. 4 Xıdo vindışe ki, ruşnə çoke. Çəyo Əy co kardışe ruşnə toykiku. 5 Xıdo nom noşe bə ruşnə «ruj», bə toyki isə «şəv». Şanqo be, maştə be, ım iminə rujbe.6  Çəyo Xıdo votışe: «Bıdə qıləy qubbə bıbu ovon arədə, əv ovon iyəndıku co bıkə». 7 Xıdo soxtışe qubbə iyən qubbə jiyədə bıə ovon çəy səpe bıə ovonku co kardışe. Jıqoən be. 8 Xıdo nom noşe bə qubbə «osmon». Şanqo be, maştə be, ım dıminə rujbe.

9 Çəyo Xıdo votışe: «Hışki bıçiyı votəynə, bıdə osmoni jiyədə bıə ovon bə ivırə qırdə bıbun». Jıqoən be. 10 Xıdo nom noşe bə hışki «zəmin», bə ov qırdə bıəyon isə «dıyon». Xıdo vindışe ki, ım çoke.

11 Çəyo Xıdo votışe: «Bıdə zəmini dim perosnı rəson: tumon perosniyə aləfon iyən zəminədə perəsın har curə bəhrinə doon. Doon mivə biyən iyən çəvon tumon çe mivon dılədə bıbun». Jıqoən be. 12 Zəmini dimi perosnişe rəson: rəsəyn har curə tum perosniyə aləfon iyən har curə doon. Doon mivə vardışone iyən çe mivon tumon çəvon dılədəbin. Xıdo vindışe ki, ım çoke. 13 Şanqo be, maştə be, ım seminə rujbe.

14 Çəyo Xıdo votışe: «Bıdə osmoni qubbədə şəvi rujiku co kardə çoon bıbun. Əvon işoron, semonon iyən rujon de soron nişo bıdən. 15 Bıdə əvon osmoni qubbədə ço bıbun, ruşnə eğandın bə zəmini dimi». Jıqoən be. 16 Xıdo soxtışe dıqlə yolə ço: Ruji idorə kardeyro yolə ço, şəvi idorə kardeyro qədə ço. Əy həmən soxtışe astovon. 17 Xıdo əvoni osmoni qubbədə noşe ki, bə zəmini dimi ruşnə eğandın, 18 ruji iyən şəvi idorə bıkən, ruşnə toykiku co bıkən. Xıdo vindışe ki, ım çoke. 19 Şanqo be, maştə be, ım çominə rujbe.

20 Çəyo Xıdo votışe: «Bıdə ovon de coninə məxloğon pur bıbun, pərəndon zəmini səpe bıə osmoni qubbədə bıpərın». 21 Xıdo ofəyəşe nəhənqə ovə əjdəhon iyən ovədə peqılə har curə luzəfırskardə həmə coninə məxloğon, həmən har curə pərəndon. Xıdo vindışe ki, ım çoke. 22 Xıdo bəvon bərəkət doşe: «Pevatə iyən heyve bıbən, pur bıkən dıyonədə bıə ovon, pərəndonən heyve bıbun zəmini dimədə». 23 Şanqo be, maştə be, ım pencminə rujbe.

24 Çəyo Xıdo votışe: «Bıdə zəmini dim bə əməl biyə har curə coninə məxloğon – har curə mol-məlon, həyvonon, luzəfırskardə coninon iyən kəfşəni həyvonon». Jıqoən be. 25 Xıdo ofəyəşe har curə coninə məxloğon – har curə mol-məlon, zəminisə luzəfırskardə har curə coninon. Xıdo vindışe ki, ım çoke.