Kəşf bıkə

Adəm iyən Həvo Edeni boğədə

2:4 Osmoni iyən zəmini ofəye barədə hikoyət jıqoye. Kulli-İxtiyorə Xıdo zəmini iyən osmoni ofəyədə, zəmini dimisə hiç qılə rəsə nıbe, 5 hiç qılə kəfşəni aləfən beşeydənıbe, çumçıko Kulli-İxtiyorə Xıdo hələ voş vığandəşnıbe bə zəmini dim iyən ofəyə bıənıbe zəmini perosniyə insonən. 6 İntasi zəmino ov beşeydəbe iyən həmə zəmini dimi doşteydəbe. 7  Kulli-İxtiyorə Xıdo soxtışe zəmini xoko insonb pu kardışe bəçəy bukə jimonə nəfəs. Demiyən inson jiyə hestemon be.

8 Çəyo Kulli-İxtiyorə Xıdo həşipemədə vırəbəvırə bıə Edenədə qıləy boğ eğandışe iyən Iştə soxtə insoni əyo səbəso kardışe. 9  Kulli-İxtiyorə Xıdo reçin çiyə iyən hardeyro ləzətinə mivə vardə curbəcurə doon perosnişe zəminədə. Əy həmən perosnişe boği miyonədə jimoni doy iyən çoki de bevəci zınəy doə doy.

10 Boği ov doşteyro Edeno qıləy ru beşeydəbe, çəyo isə bə ço xolə co beydəbe. 11 Çəvon qıləyni nom Pişone. Əv həmə Xavilə məmləkəti qarde-qarde ru beydə. Əyo ğızıl heste. 12 Çı zəmini ğızıl çoke. Əyo ətrinə ğıy iyən oniks heste. 13 Çe dıminə ruy nom Qixone. Əv həmə Kuş məmləkəti qarde-qarde ru beydə. 14 Çe seminə ruy nom Dəcləye. Əv Aşşuri həşipeməo ru beydə. Çominə ru Fərate.

15 Kulli-İxtiyorə Xıdo peqətışe inson bə Edeni boğ noşe ki, perosnı iyən nığo bıkə ə vırəy. 16 Kulli-İxtiyorə Xıdo əmr kardışe bə insoni votışe: «Boğədə bıə həmə doon bəhərono bemoniyə harde bəzıneş. 17 Əncəx çoki iyən bevəci zınəy doə doy mivəo məhə, çumçıko çəvo hardə ruji hukman bəmardeş».

18 Kulli-İxtiyorə Xıdo ijən votışe: «İnsoni tənho be çok ni, Az boəy mınosibə qıləy koməqəvon bəsoxtem». 19 Kulli-İxtiyorə Xıdo həmə kəfşəni həyvonon iyən osmonədə bıə həmə pərəndon zəmino soxtışe. Çəyo vardışe əvon çe insoni tono ki, insoni bımon çoknə nom noy bıvindı. İnsoni bə har həyvoni çoknə nom noşebu, çəy nom jəqoən mande. 20 İnsoni bə həmə mol-məlon, osmoni pərəndon iyən bə kəfşəni həyvonon həmməy nom noşe, intasi bə insoni mınosib bıə qıləy koməqəvon pəydo nıbe. 21 Bəvədə Kulli-İxtiyorə Xıdo bo insoni qıləy nığılə han vığandışe. İnson hıte bəpeştə, peqətışe çəy qıləy kəməparçə, edoşe de qujdi çəy vırə. 22 Kulli-İxtiyorə Xıdo insoniku peqətə kəməparçəyo jeni soxtışe, vardışe əv insoni tono. 23 İnsoni votışe:

«Diyəkə, mılxəs, çımi
Astə çımı astədəy,
Andomış çımı andomədəy.
“Jen” bəbe çəy nom,
Çumçıko merdikuc peqətə bıə əv».

24  Bı səbəb merd ıştə pıə-moə tərq bəkarde bəştə jeni umuj bəbe, əvon iqlə andom bəben. 25 Merd iyən çəy jen – har dıynənən qucilibin, əncəxən çımiku xəcolət kəşeydənıbin.