Kəşf bıkə

53:1 Ki bovə kardışe bəçəmə vardə xəbə,
Kulli-İxtiyori ğudrət bə ki zahir be?
2 Əv Kulli-İxtiyori huzurədə bənə qıləy şivi,
Hışkə zəminədə beşə rişə ğəzinə perəsey.
Diyə kardeədə nıbeşe nə reçinəti nəən rəvoş,
Bəmə xoş omə zahiri simoşən nıbe.
3 Odəmon exroc zınəşone əv rədd kardışone.
Əy kəşəşe dard iyən çəşəşe doj,
Odəmon dim qordınişone Çəyku, exroc qətışone.
Əmə dəqər nıdomone Bəy.

4 Əy Iştən kəşəşe çəmə noxəşiyon,
Iştə səpe peqətışe çəmə dardon.
Əmə isə jıqo zınəmone ki, Xıdo cəzo doşe Bəy,
Jəşe ki, iztirob bıkəşı Əv.
5 Bəçəmə usyonkorəti qorə Çəy andom hılkardəbe,
Şərə əməlon hıcubəto şırtkardəbe,
Bəçəmə əmin-əmonəti qorə Əy cəzo səşe,
Deçəy yaron əmə şifo səmone.
6 Əmə həmməy pəsi ğəzinə ıştə roy dəqijniyəmonbe,
Har kəs deştə roy şeydəbe.
Kulli-İxtiyori Çəy səpe noşe çəmə şərə əməlon şələ.

7 Zılm kardışone Bəy,
Əy iztirob kəşəşe, əmma onıkardışe ıştə qəv.
Obırniyero bardəbıə pəsəvə ğəzinə,
Paşmə toşəkəson vədə bezıvonə pəsi ğəzinə
Onıkardışe ıştə qəv.
8 De beinsofəti məhkum kardəbe bardəbe bo kışte.
Çəy nəsli barədə ki fikir karde əzni?
Oxo bəçımı xəlği usyonkorəti qorə
Edom kardəbe, bəyjiyon arəo şodoəbe.
9 Əy hiç bevəci nıkardışe,
Çəy qəvo duyəvojə sıxan benışe,
Əmma çəy ğəb bevəcə odəmon tono noəbe,
Ərbobə odəmi tono dəkandəbe.

10 Əmma Kulli-İxtiyori piyəşe, Əv iztirob bıkəşı,
Çəy kəşə əzyəton Kulli-İxtiyori irodəkube.
Iştə coni taxsıri ğırboni ğəzinə təğdim bıko,
Iştə nəslo bıəyon bəvinde, umri dıroz bəkarde.
Kulli-İxtiyori piyəy deçəy vositə ovandin bəbe.
11 Əv Iştə kəşə iztirobon bəhrə bəvinde rozi bəmande,
Çımı salehə ğul deştə zınəy bo veykəson bəroət bəvarde,
Çəvon şərə əməlon şələ Iştə səpe pebəqəte.
12 Bıçımiro Az bəy yolə odəmon arədə baxşə bədom.
Əv ğəniməti de ğalib oməkəson paybaxş bəkarde.
Oxo Əy fido kardışe Iştə coni,
Bə usyonkoron bərobər qətəbe.
Vey kəson qıno Iştə səpe peqətışe,
Usyonkoron qorə lovə kardışe.