Kəşf bıkə

Çe İsa moəo be navo votə beydə

1:26 Elizaveti hamiləti şəşminə manqədə Xıdo vığandışe mələk Cəbrayil bə Qalileyə Nazaret nomədə bıə şəhr, 27 qıləy ənəbuəstə kinə tono. Əv hoştə bıəbe Davudi nəsılo bıə Yusif nomədə bə qıləy merdi. Çə kinə nom Məryəmbe. 28 Mələk oməy çəy tono votışe: «Səlom ha lutf sə kinə! Kulli-İxtiyor detıne». 29 Məryəm çəy votə sıxanonku dırdilə be, dəmande ıştə dılədə bo no-peqət karde ki, ım çı səlombe. 30 Mələki votışe bəy: «Mətars, Məryəm, tı lutf səy Xıdoku;31 Tı bə əğıl bəmandeş, qıləy Zoə bəzandeş, Çəy nomi İsa bınə. 32 Əv yolə odəm bəbe, Xıdovandi-Aləmi Zoə bəvoten Bəy. Kulli-İxtiyorə Xıdo Çəy pıə Davudi taxti bədo Bəy; 33 Əv Yağubi nəsıli səpe zol podşo bəbe, Çəy Podşoəti oxoy nıbəbe». 34 Məryəmi votışe bə mələki: «Im çoknə be bəzıne? Az hələ ənəbuəstə kinəm». 35 Mələki cəvobədə votışe: «Mığəddəsə Ruf ıştı səpe bome, Xıdovandi-Aləmi ğudrət soğnə səbəğande bətı, əve bəştı zandə Mığəddəsi Xıdo Zoə bəvoten. 36 Imha, ıştı avlod Elizavet ıştə piyəti vaxtədə mande bə əğıl. Bəy beson voteydəbin, əmma şəş manqe bə qıləy zoə əğıli hamiləye. 37 Çumçıko bo Xıdo mımkun nıbə hiçiy ni». 38 Məryəmi isə votışe: «Az Xıdo ğulim, bıdə ıştı votəy ğəzinə bıbu demı». Bəvədə mələki tərq kardışe əv şe.

İsa bə dınyo ome

2:1 Jəqo be ki, həmonə rujonədə ğeysər Avqusti ıştə həmə əholi siyohisəy barədə fərmon doşe. 2 Im iminə siyohisəybe, Suriyədə Kirini vali bıə vaxtonədə dəvoniyə be. 3 Əve həməkəs dəro qıniye şe bəştə şəhr ki, ıştəni bə siyohi ğeyd bıdə karde.

4 Həmçinin Yusifən Qalileyə şəhr Nazareto bə Yəhudeyə, Davudi şəhr Bet-Lehem şe, çumçıko əv Davudi nəslo-tumobe. 5 Əv deştə əğılbəboloə pəvəndi Məryəmi bə ico şin ki, ıştəni bıdən ğeyd karde. 6 Əvon əyo beədə Məryəmi mırəxxəs bey vaxt rəsəy. 7 Əy zandışe Iştə iminəvəçə Zoə, ğındəğ kardışe Əv, noşe hori dılədə, çumçıko boəvon mehmonxonədə vırə pəydo nıbe.

Mələkon şoyə xəbə doydən bə qələvonon

8 Həmonə məmləkətədə qələvonon hestbin. Əvon şanqo daştədə qələ tono nubə kəşeydəbin. 9 İberdəmədə Kulli-İxtiyori mələk çiyəy bəvon, Kulli-İxtiyori ehtişomi nur səğandışe çəvon səpe, əvon bərk bə tars dəşin. 10 Mələki votışe bəvon: «Mətarsən! Az boşmə cəmi xəlği vey şoybəsə kardə qıləy şoyə xəbə vardəme, 11 çumçıko ımruj Davudi şəhrədə boşmə Xıloskor moəo be, Əv Kulli-İxtiyor Məsihe. 12 Imən boşmə nışonə: şımə pəydo bəkaşon ə Korpə ğındəğbətan olxortıniyə bıə hori dılədə». 13 İberdəmədə mələki tono çiyəy osmoni ləşğər. Əvon bə Xıdo həmd karde-karde voteydəbin:

14 «İzzət bıbu bə Xıdo osmonon ərşədə!
Zəmini dimisə Əçəy rozi mandə bə odəmon sulh bıbu».

15 Mələkon çəvonku esiyə, bə osmon rost be bəpeştə qələvonon votışone bə iyəndı: «Bışəmon bə Bet-Lehem, bunəmon ım çı xəbəbe Kulli-İxtiyori doşe bəmə». 16 Əve əvon tadibəsə oməyn pəydo kardışone Məryəm de Yusifi iyən hori dılədə olxortıniyəbıə Korpə. 17 Əy vinde bəpeştə mələki çe Korpə həxədə bəvon votə həmə sıxanon qəp jəşone. 18 Imi məsəkəson həmməy hədəyon mandin bə qələvonon votə sıxanon. 19 Əmma Məryəm ımoni həmməy ıştə dılədə oqəteydəbe iyən bı barədə şıneydəbe. 20 Qələvonon bəştə məsə iyən vində çiyon həmməy qorə izzət doşone bə Xıdo şukur karde-karde oqardin bə dumo. Çumçıko çiç votəşonbe bəvon jəqoən be.