Kəşf bıkə

Cıni qətə odəm xəş kardə beydə

5:1 Əvon şin qoli bə japədə bıə Qadaravıjona məmləkət. 2 İsa kuloso eşencən ğəbə məğaronədə mırdolə rufi qətə qıləy odəm Deəy dimbədim oməy. 3 Əv ğəbə məğaronədə jiyeydəbe iyən hiçki de zinciri zuyən oqəte zıneydənıbe əy. 4 Çandə kərə bəy poband, zincir jəşonbe, intasi əy çıpniyəşbe zinciron, vırtivılo kardəşbe pobandon. Hiçki zu vışkiyeydənıbe əy aşiş bıkə. 5 Hejo, şəv-ruj çameydəbe ğəbıstonədə, bandonədə zikkə jəydəbe iyən ıştəni de sığon yarəjə kardeydəbe. 6 Əv diyəroədə İsa vindencə vite oməy, səcdə kardışe Bəy, 7v otışe bərkədə cure-cure: «Ha İsa, Xıdovandi-Aləmi Zoə, çiçı piyeydə çımıku? Tıni ğəssəm doydəm bə Xıdo, korığ mədə bəmı!» 8 Çumçıko İsa votəşbe bəy: «Ha mırdolə ruf, beşi çı odəmo!» 9 Çəyo İsa parsəy çəyku: «Çiçe ıştı nom?» Əy cəvob doşe: «Çımı nom Ləşğəre, çumçıko əmə veyimon». 10 Əy vey lovə kardışe bə İsa ki, mırdolə rufon nıtojnı çı məholo.

11 Qıləy dıjdə xuqə qələ çardeydəbe əyo çəkerədə. 12 Mırdolə rufon lovə kardışone bə İsa: «Əməni bə xuqon dılə bıvğand ki, dəşəmon bəçəvon dılə». 13 İsa icozə doşe bəvon. Mırdolə rufon beşin odəmo, dəşin bə xuqon dılə. Dı həzo səysə vey həyvonədə iborətə qələn həmməyəvo partəğə doşone ıştəni rıjo bə qol, təsəyn əyo.

14 Xuq çovniyəkəson vitin pevılo kardışone ın xəbə bə şəhri iyən diyon. Cəmat oməy bə təmşo bə iyo bıəyon. 15 Əvon oməyn çe İsa tono, sıftə bə tars dəşin, vindeədə ki, i ləşğər cıni qətə odəmi tankardəşe iyən ağılmand-ağılmandi nıştə. 16 Hodisə vindəkəson qəp jəşone bo cəmati bə cıni qətə odəmi sə oməyon iyən xuqon barədə. 17 Dəmandin bə İsa lovə karde ki, beşu çəvon məholo. 18 İsa penışteədə bə kulos, cıni qətə odəmi Bəy lovə kardışe ki, əyən Deştə peqətı. 19 İsa icozə nıdoşe bəy, əmma votışe: «Bışi bəştə kə, ıştə ov-avlodi tono, boəvon qəp bıjən Kulli-İxtiyori botı kardə har çiy iyən bətı çoknə mərhəmət nişo doy». 20 Im odəmən şe məhol Dekapolisədə dəmande bo pevılo karde çe İsa bəy kardə har çiy, cəmatən hədəyon mande.