Kəşf bıkə

Xəymandə Samariyəvıj

10:25 İ kərə qıləy Tovrati mıəllim əşte, piyəşe dəvinə bıkə İsa, əve parsəy Çəyku: «Ustod, az çiç kardəninim ki, zolə jimoni irs bıstənım?» 26 İsa parsəy çəyku: «Bəs çiç voteydən bı həxədə Tovratədə? Tı çiç handeydəş əyo?» 27 Əy cəvobədə votışe: «“Bıpi ıştə Xıdo Kulli-İxtiyori, dılisıxto, deştə həmə coni, deştə həmmə zuy iyən deştə həmə ağıli iyən Bıpi ıştə hamsiyən bənə ıştə”». 28 İsa votışe bəy: «Səroste ıştı cəvob. Jəqoən bıkə, bəjiyeş». 29 Əmma əy piyəşe bə sofi bekə ıştəni, əve parsəy İsaku: «Bəs kiye çımı hamsiyə?»

30 İsa cəvobədə votışe: «Şəxsi şeydəbe Yerusəlimo bə Yerixo, əv eqıniye bə ğulduron çanq. Əvon kisib kardışone, kuyəşone əv, çəyo oqətışone marde holədə şin. 31 Jıqo be ki, qıləy kahin dəvardeydəbe çəvırəo, əmma əy vindencən, ovaşte roy bə tərəf dəvarde şe. 32 Həmçinin jəqo kardışe qıləy levitiyən. Əvən oməy bə həmonə vırəy rəseədə vindışe yarəjə odəm, ovaşte roy bə tərəf dəvarde şe. 33 Qıləy Samariyəvıj isə də roy şeədə vindışe əv, bəboliş oməy bəy. 34 Əv nez oməy bəy, de şərovi şıştışe çəy yaron, zeytunə ruyən dəsuşe, dəpuştışe, penşandışe əv bəştə həyvoni, vardışe bə mehmonxonə, mande çəy ğollığədə. 35 Maşkinəy əv dəro qıneədə bə mehmonxonə soybi dı dinar doşe, votışe: “Çəy ğollığədə bımand, qirəm çımı doə pulisə vey xarcı beşo, oqardəsə puli nırəsəy bədom bətı”. 36 Çı se kəsi kom qıləyni, ıştı zınəy, bə ğulduri dast eqıniyə odəmi hamsiyəbe?»

37 Əy cəvob doşe: «Ə şəxs ki, mərhəmət kardışe bəy». İsa votışe bəy: «Bışi, tınən jıqo bıkə».

Qin bıə zoə məsəl

15:11 İsa votışe ımən: «Qıləy odəmi dıqlə zoə hestışbe. 12 Rukə qılə votışe bəştə pıə: “Pıə, ıştə əmlokədə bəmı rəsə hissə bıdə bəmı”. Pıən baxş kardışe ıştə əmlok zoon arədə.

13 Ənəhoy dənıvarde rukə zoə qırdə kardışe ıştə həmə əmlok, şe bə qıləy diyəroə məmləkət. Əyo beəxloğə jimon dəvonişe, xarc kardışe ıştə heste-bıəy. 14 Həmməy xarc karde bəpeştə bə məmləkətədə yolə vəşyəni eqıniye, əv bə peyəçınə ruj eqıniye. 15 Əv şe, qıləy çəvırəyjə odəmi tono bə ko dəşe, əyən vığandışe əv ıştə məzədə bo xuq çovniye. 16 Zoə orzu kardeydəbe ki, hiç nıbo si bıkə ıştəni bə xuqon doə bıə de xol-xıçə luy, əmma hiç kəs hiçi doydənıbe bəy.

17 Bəvədə zoə ağıl oməy bəçəy sə votışe: “Çımı pıə çandə kəs koəkə hestışe, çəvon həmməy bolə hardemon hestışone, əmma az vəşi mardeydəm iyo! 18 Bəştem obəqardem ıştə pıə tono, bəvotem bəy: ‹Çımı pıə, az bə Osmoni iyən bəştı vəynə qıno kardəme. 19 Az həni bətı zoə beyro loyiğ nim, jıqo ğəbul bıkə ki, azən ıştı koəkon qıləynim›”. 20 Zoə əşte şe ıştə pıə tono. Əv hələ diyəroədəbe, çəy pıə vindışe, bəboliş oməy boştə zoə. Pıə vite, ıştə daston eğandışe bəştə zoə qiy, maçə kardışe bəy. 21 Zoə votışe bəy: “Pıə, az bə Osmoni iyən bəştı vəynə qıno kardıme. Az həni bətı zoə beyro loyiğ nim”. 22 Əmma pıə votışe bə nokon: “Rəyrə biyən ən çokə libosi, tanbıkən bəy. Anqışteyən pevonən bəçəy anqıştə, şım po bıkən bəçəy lınqon. 23 Biyən obırnən qıləy kokə poynə. Bəhəmon iyən şoyvo bıkəmon. 24 Çumçıko çımı ım zoə mardəbe, sənibəton bəyji be, qin bıəbe, pəydo be”. Əvon dəmandin bo şoyşotkomə karde.

25 Bı vaxti yolə zoə məzədəbe. Əv oqardeədə bə kəy nez oməy, məsəşe musiği jəydən iyən raxs kardeydən, 26 sədo kardışe nokon qıləyni, parsəy çəyku ki, çiç bıə əyo. 27 Nokə votışe: “Iştı boə oqardə. Əve ıştı pıə çəy səğ-səlomət oqarde səbəbo obırniyəşe kokə poynə. 28 Yolə zoə anə rıkno be ki, hiç nıpiyəşe dəşu bə kə. Bəvədə pıə beşe bəçəy nav, dəmande əy bə zıvon qəte”. 29 Əmma əy cəvob doşe bəştə pıə: “Imha, az çandə soronin bənə ğuli bə kom botı, hiç vaxtiən beşənim ıştı sıxano, əmma tı hiç vaxti qıləy bızəvəçən nıdoy bəmı ki, az deştə duston şotkomə bıkəm. 30 Iştı ım zoə isə sərf kardəşe ıştı həmmə əmlok bə beəxloğə jenon. Əmma əv oqardeədə tı qıləy kokə poynə obırniyə boəy!” 31 Pıə isə votışe bəy: “Çımı balə, tı hejo demıniş, çımı heste-ni ıştıne. 32 Esə şo bey iyən şoyvo kardey lozime ki, ıştı ım boə mardəbe, bəyji bıə, qin bıəbe, pəydo bıə!”»