Kəşf bıkə

Sədəxə doy barədə

6:1 Hodi bıbən, şımə salehə ko kardeədə insonon vədə bəvon nişo kardeyro məkən ımi. Neysə ıştə osmononədə bıə Pıəku mıkofot nıbəsteyon.

2 Bı səbəb sədəxə doəsə ıştə navədə de şeypuri sədo car məkəş. Çumçıko dıdimə odəmon sinaqoqonədə iyən kuçonədə jıqo kardeydən ki, odəmon əvoni tarif bıkən. Rosti voteydəm bəşmə: əvon səşone ıştə mıkofot. 3 Əmma tı sədəxə doəsə, bıdə ıştı çəpə dast nıznı, rostə dast çiç kardeydə. 4 Bıdə ıştı doə sədəxə niyoni bımandı. Iştı niyoniədə bıəyon vində Pıə çəy əvəzi bədo bətı.

Dıvo karde barədə təlim

5 Şımə dıvo kardə vaxti bənə dıdimə odəmon məbən. Çumçıko jıqo odəmon bəpiyeşone pemandın sinaqoqonədə iyən kuçə səonədə dıvo bıkən ki, odəmon bıvindın əvoni. Rosti voteydəm bəşmə: əvon həni səşone ıştə mıkofot. 6 Əmma tı dıvo kardeəsə dəşi bəştə otağ, bıbast kəybə, dıvo bıkə bəştə niyoniədə bıəyon vində Pıə. Iştı niyoniədə bıəyon vində Pıə bədo bətı mıkofot.

7 Dıvo kardeədə bənə bıtpərəston bemənoə sıxan məkən. Çumçıko əvon jıqo zıneydən ki, vey sıxan bıkon məsə bəben. 8 Şımə bənə bəvon məbən! Çumçıko şımə Pıə şımə Çəyku piyəysə bənav zıneydə bə çiçi ehtiyoci hestıone. 9 Bı səbəb şımə jıqo dıvo bıkən:
“Çəmə Osmononədə bıə Pıə,
Mığəddəs qətə bıbu Iştı nom,
10 Iştı Podşoəti bo,
Osmononədə Iştı irodə çoknə bə vırə rəseydə
Zəminisən jəqo bə vırə bırəsı.
11 Çəmə ımrujnə ruzi bırosın bəmə.
12 Bəmə bevəci kardəkəson əmə baxşe ğəzinə
Tınən bıbaxş çəmə kardə bevəciyon.
13 Dəvinə məkə əməni,
Əmma peroxın əməni şəriliku.
Çumçıko podşoəti, ğudrət iyən izzət
Zol Iştıne. Amin”.

14 Qirəm şımə co insonon kardə bevəciyon bıbaxşon, şımə Osmoni Pıən şıməni bəbaxşe. 15 Ehanə şımə co insonon nıbaxşon, şımə Pıən şımə kardə bevəciyon nıbəbaxşe.

Rujə barədə təlim

16 Rujə qətə vaxti bənə dıdimə odəmon ğəmqin mənəvən. Əvon ıştə rujə bə insonon nişo doyro ıştə diyənon ekardeydən. Rosti voteydəm bəşmə: əvon səşone ıştə mıkofot. 17 Əmma tı rujə qəteədə bəştə səy ruyən dəsu iyən bışışt ıştə dimi. 18 Jıqo ki, bə insonon ne, bəştə niyoniədə bıə Pıə rujəyn bıçiy. Niyoniədə bıəyon vində Pıə bədo bətı mıkofot.

Tənxo barədə təlim

19 Bı dınyoədə boştə tənxo qırdə məkən. Əyo mırğunə iyən pos məhv bəka əvoni, yaan dızdon dəbəşen bədızden. 20 Çımi əvəzi osmonədə boştə tənxo qırdə bıkən. Əyo, nə mırğunə, nə pos məhv bəka əvoni, nəən dızdon dəbəşen bədızden. 21 Çumçıko ıştı tənxo konco bıbo, ıştı dılən əyo bəbe.

22 Çəş həmə andomi çoye. Qirəm ıştı çəş xəş bıbo, ıştı həmə andomən ruşin bəbe. 23 Ne, qirəm ıştı çəş noxəş bıbo, ıştı həmə andom toyki bəbe. Qirəm bətıku bıə “nur” toyki bıbo, zılmot çanədə yole!

24 Hiç kəs bə dıqlə əğə ğollığ karde əzıni: ya bə qıləy nifrət bəkarde, bəpiyeşe ə qıləyni, yaan bə qıləy band bəbe, məhəl nıbəno bə ə qıləyni. Şımə ğollığ karde əzıniyon, həm bə Xıdo, həmən bə tənxob.

Ğəyğu məkəşən

25 Bı səbəb bəşmə voteydəm: boştə coniro ğəyğu məkəşən ki, “Çiç bahardemon?”, yaan “Çiç pebəşomemon?” iyən boştə andomiro ki, “Çiç tanbəkardemon?” Con hardeysə, andom tankardeysə həniyən vocib ni? 26 Diyəkən bə osmoni pərəndon: əvon nə kaşteydən, nə dıveydən, nəən anbonədə oqəteydən. Əmma şımə Osmoni Pıə bəvon hardehəş doydə. Şımə çəvonsə həniyən ğıymətin nişon? 27 Şıməhon kom qıləyni de ğəyğu kəşe, ıştə umri hiç nıbo i ləz dıroz karde bəzıne? 28 Boçi bo oləti ğəyğu kəşeydon? Bunən çoknə yol beydən daşti zənbəğon: əvon nə zəhmət kəşeydən, nəən ter rışteydən. 29 Əncəx ımi bəşmə voteydəm ki, ıştə həmə cəh-cəloli dılədə bıə Suleymani jıqo, bənə çımon qıləyni tankardəşnıbe. 30 Ha imoni kam bıəkəson, ımruj hest bıə maştə bə kiyə şodoə bıə daşti aləfi Xıdo jıqo tankardovneydəbu, şıməni tankardovniye həniyən yəğın ni? 31 De jıqo, ğəyğu məkəşən “Çiç bahardemon?”, “Çiç pebəşomemon?”, yaan “Çiç tanbəkardemon?” 32 Çumçıko dınyo xəlğon nəveydən bıçımon həmməy. Həğiğətən, şımə Osmoni Pıə zıneydə ki, ımon həmməy bəşmə lozimin. 33 Əve şımə sıftə bo Xıdo Podşoəti iyən Bəçəy salehəti bınəvən. Bəvədə ımon həmməy əlovə doə bəben bəşmə. 34 De jıqo, bo maşkinə ruji ğəyğu məkəşən. Çumçıko maşkinə ruj boştə ğəyğu bəkəşe. Har ruji yamənəti bə həmonə ruji vəse!