Kəşf bıkə

İsa çiyeydə bə Yonzə şoqirdi

24:36 Əvon bı barədə qəp jəyədə İsa Iştən mande çəvon arədə, votışe bəvon: «Səlom bıbu bəşmə!» 37 Əvon tarsiku hut bin, jıqo zınəşone ki, ruf vindeydən. 38 Əmma İsa votışe bəvon: «Boçi həyəcon dəvoneydəşon, boçi şək vardeydəşon? 39 Diyəkən Bəçımı daston iyən lınqon. Im Az Iştənim! Pexəviyən Bəmı, diyə bıkən, oxo rufi beydənişe qujd iyən astə, əmma Bəmıku heste». 40 İsa votışe ımoni, nişo doşe bəvon ıştə daston iyən lınqon. 41 Əvon şoyvo dılədə hələ bovə kardeydənıbin iyən təəccubi dılədəbin, İsa votışe bəvon: «İyo jıçiy heste bo harde?» 42 Əvon doşone Bəy i vəslə patə moy. 43 İsa peqətışe, çəvon çəşi vədə hardışe.

44 Çəyo votışe bəvon: «Az deşmə bə ico beədə bəşmə votəyon ımonin ki, Musa Tovratədə, Peyğəmbəron Kitobədə iyən Zəburədə Çımı barədə nıvıştə bıəyon bə vırə rosniye lozime». 45 Bəvədə İsa okardışe çəvon zehin ki, əvon sərəsın bə Mığəddəsə Nıvıştəyon. 46 Çəyo votışe bəvon: «Jıqo nıvıştə bıə, Məsih əzob kəşənine, seminə ruji çe mardon dılədə bəyji bıənine. 47 Yerusəlimikuş qətə bo həmə milləton qınon baxşeyro Deçəy nomi tobə vəz kardə bıənine. 48 Şımə ki çımi şoydişon. 49 Imha, Az bəvığandem boşmə Çımı Pıə vəd kardəy, şımə esə boy, bımandən bı şəhrədə, tosə bə vaxti ki, osmono omə ğudrəti bəsteşon».

Çe İsa bə osmon rost kardə bey

50 İsa bekardışe əvon şəhro bə kəno, vardışe tosə Betanyə, Iştə daston rost kardışe, xəy-dıvo doşe bəvon. 51 Xəy-dıvo doy-doy rost kardə be bə osmon çəvonku esiyəy. 52 Şoqirdonən səcdə kardışone bə İsa, çəyo bərk şoyvo dılədə oqardin bə Yerusəlim. 53 Əvon hejo məbədədə beydəbin bə Xıdo həmd-səno kardeydəbin.