Kəşf bıkə

Çe İsa bəyji bey

24:1 Hejo çe haftə işanbə ruji sipyəsıvədə, əvon peqətışone ıştə hozı kardə ətron, oməyn ğəbi tono. 2 Əmma vindışone ğəbi qəviku bıə sığ quli kardə bıə bə kəno. 3 Dəşin bə dılə, pəydo nıkardışone əyo Kulli-İxtiyor İsa cəsəd. 4 Əvon hut mandəbin, berdəmədə aski-viski jə olətbətan dıqlə merd zahir be çəvon vədə. 5 Jenon tarsi dılədə zəvbədim qınin bə zəmin. Merdon parsəyn: «Boçi bo Bəyjiy mardon dılədə nəveydəşon? 6 Əv iyo ni, Əv bəyji bıə! Bəştə yod biyən, Əy çiç votəşbe bəşmə hələ Qalileyədə beədə. 7 Votəşbe ki, “Bəşəri Zoə təslim kardə bıənine bə qınokorə insonon, bə çomex kəşə bıənine iyən seminə ruji bəyji bıənine”». 8 Bəvədə bəçəvon yod oməy Çəy votəyon.

9 Ğəbıstono oqardə jenon xəbə doşone ın vağeə bə Yonzə şoqirdi iyən bə co kəson həmməy. 10 Bə həvariyon ın xəbə rosniyəkəson Məcdəlıjə Məryəm, Yohannə, Yağubi moə Məryəm iyən co jenonbin. 11 Əmma ın xəbon vərsəğe çiyəyn bə həvariyon, əve bovə nıkardışone. 12 Əmma Peter əşte, vite bə ğəbi tərəf. Əv enəməy vindışe əncəx kətonə parçon, hədəyon be bı ğəziyə, oqarde bə kə.

İsa çiyeydə bəştə dıqlə şoqirdi

13 Jıqo be ki, hejo həmonə ruji çəvonədə dı kəs şeydəbin bə Yerusəlimi təğribən yonzə kilometr diyəroədə bıə Emmaus nomədə qıləy di. 14 Əvon vağe bıə ın ğəziyon həmməy barədə ıştə arədə qəp jəydəbin. 15 Hejo bı barədə qəp jəy-jəy mızokirə kardeydəbin ki, İsa Iştən nez oməy dəmande deyəvon bə ico ro şe. 16 İntasi jıqo bızın çəvon çəşon vibin, əve nıznəşone Əv.

17 İsa parsəy çəvonku: «Şımə ro şe-şe ıştə arədə çiçi barədə mızokirə kardeydəşon?» Əvon mandin, vey ğəmqinbin. 18 Çəvonədə Kleopə nomədə bıə qıləyni cəvob doşe: «Bə Yerusəlim oməkəson dılədə iqlə tıniş ki, bı rujonədə əyo vağe bıəyonku bexəbəş?» 19 Əy votışe bəvon: «Kon ğəziyon?» Əvonən votışone Bəy: «Nazaretıjə İsa barədə bıə ğəziyon. Əv çe Xıdo iyən həmə xəlği nəzədə həm əmələdə, həmən təlimədə qıləy ğudrətinə peyğəmbərbe. 20 Çəmə rəhbərə kahinon iyən rəison bə marde məhkum kardeyro təslim kardışone Əv, doşone bə çomex kəşe. 21 Əmma əmə umdəvobimon ki, İsraili Peroxniyəkəs Əve. Ğərəyz bımi, esət həni se ruje ki, ın ğəziyon vağe bıən. 22 Iştənən çəmə kali jenon hədəyon oqətışone əmə, əvon rəbədə şəbin ğəbisə, 23 pəydo kardəşonnıbe Çəy cəsəd əyo, oqardin votışone ki, mələkon zahir bin bəmə, əvon votışone ki, Əv bəyjiye. 24 Çəməhon kali kəson şin ğəbisə, bənen hejo jenon votəy ğəzinəy, əmma nıvindışone Əv».

25 Bəvədə İsa votışe bəvon: «Şımə çanə beağıliyon ki, bə peyğəmbəron votəyon həmməy di bovə kardeydon! 26 Bəqəm Məsih ın əzobon həmməy kəşənin iyən Bəştə izzəti rəsəninnıbe?» 27 Çəyo izoh kardışe bəvon Musaku iyən həmə Peyğəmbəronkuş qətə Mığəddəsə Nıvıştəyon həmməyədə Iştə barədə bıəyon.

28 Əvon nez bin bəştə şənin bıə diy. İsa Iştənış jıqo nişo doy ki, quya Əv deştə roy bəşe. 29 Esə boy, əvon de təkidi xahiş kardışone İsaku ki, «bımand deyəmə, çumçıko həşi nışteydə iyən toyki darşiyeydə». Əvən deyəvon bə ico dəşe bə kə.

30 Əv deyəvon bə surfə nışteədə peqətışe nun, şukur kardışe, poə kardışe, doşe bəvon. 31 Bəvədə çəvon çəşon obəyn, əvon zınəşone İsa. İntasi İsa bəçəvon çəş nıçiyəy. 32 Əvon votışone bə iyəndı: «Əv roədə deyəmə qəp jəyədə iyən Mığəddəsə Nıvıştəyon izoh kardeədə çəmə dılon şoyvoyku pevaşteydənıbin?»

33 Əvon dərhol əştin səpo, oqardin bə Yerusəlim, pəydo kardışone əyo Yonzə şoqird iyən deyəvon bə ico qırdə bıəkəson. 34 Imon voteydəbin: «Kulli-İxtiyor həğiğətən bəyji bıə, bə Simoni çiyə». 35 Bəvədə əvon qəp jəşone roədə bıəyon iyən nuni poə kardeədə çoknə zınəşone İsa.