Kəşf bıkə

Qınoro ğırbon

4:1 Kulli-İxtiyori votışe bə Musa: 2 «Jıqo bıvot bə İsrailıjon: “Qirəm kiysə Kulli-İxtiyori həmə əmronədə qıləyni nızne-nızne dəqordıniyəşebo, bıdə bımon əməl bıkə.

3 Qirəm məsh kardəbıə kahini qıno kardəşebo, qınobəqi kardəşebo xəlğ, əv bə qınoro bo Kulli-İxtiyori beğusurə neqo ğırbon təğdim kardənine. 4 Əv neqo biyə bə Vindemonə Çodı dəşəco bə Kulli-İxtiyori huzur iyən ıştə daston bınə həyvoni səysə, əy obırnı Kulli-İxtiyori huzurədə. 5 Çəyo məsh kardəbıə kahin neqo xunədə peqətı biyə bə Vindemonə Çodı. 6 Kahin ıştə anqıştə ejənı bə xuni haft kərə peşandı Kulli-İxtiyori huzurədə Ən Mığəddəsə Vırəy pardə vədə. 7 Çəyo kahin Vindemonə Çodıədə, Kulli-İxtiyori huzurədə bıə xoşbuyə buxuri suteyro bə ğırbonqo şoxon çə xunədə dəsu, neqo xuni mandəy isə ekə çe Vindemonə Çodı vədə bo sutniyə ğırbonon bıə bə ğırbonqo bınəmi. 8 Bıdə kahin qınoro ğırbon vardəbıə neqo ləvəruyə səpenə piy həmməyəvo iyən çəy həmə piy, 9 har dıqlə veki, çəy roni səpenə piy iyən siyociqəri deçəy pardə de vekon bə ico bekə. 10 Imoni həmməy unsiyətə ğırbon bıə dıjdəsə həyvonədə bekardə bey ğəzinə bıkə iyən həmonə kahin bo sutniyə ğırbonon bıə ğırbonqoədə bə duyəvuli bıjənı bısutı. 11 Neqo pusti, səyku bə şıvəkon həmə qujdi – ləvəruyon iyən dılətoni həmməyəvo, 12 neqo mandə hisson nıştəcoo bə kəno bekə, əy ekə xok ekardəbıə pokə vırədə, ezımon səpe bısutı.

13 Qirəm İsraili həmə icmo nızne-nızne qıno kardəşebo, ım çəvon nəzədə nibo iyən Kulli-İxtiyori həmə əmronədə qıləyni dəqordınon qınobəqiy bıbon, 14 çəvon kardə qıno bə oşko beşeədə cəmat bo qınoro ğırbon qıləy neqo biyə bə Vindemonə Çodı və. 15 İcmo sipirişon Kulli-İxtiyori huzurədə ıştə daston bınən neqo səysə əy obırnın. 16 Çımi bəpeşt məsh kardəbıə kahin çe neqo xunədə peqətı biyə bə Vindemonə Çodı. 17 Kahin ıştə anqıştə ejənı bə neqo xun haft kərə peşandı Kulli-İxtiyori huzurədə pardə vədə. 18 Çəyo kahin ə xuni dəsu Vindemonə Çodıədə Kulli-İxtiyori huzurədə bə ğırbonqo şoxon iyən neqo xuni mandəy isə ekə Vindemonə Çodı dəşəcoədə sutniyə ğırbononro bıə bə ğırbonqo bınəmi. 19 Həmonə həyvoni həmə piy ğırbonqoədə bə duyəvuli bıjənı bısutı. 20 Çoknə qınoro ğırbon vardəbıə neqo edaştıyone ımiyən jəqo bıkən. Jıqonə kahin xəlği qınon kəffarə bıkə ki, xəlğ baxşə bıbu. 21 Çəyo kahin neqo bekə nıştəcoku bə kəno, sıftənə neqo sute ğəzinə ımiən bısutı. Im, bo cəmati qınoro doəbıə ğırbone.

22 Rəhbəronədə kiysə qıno kardəşebo, ıştə Xıdo Kulli-İxtiyori həmə əmron qıləyni nızne-nızne dəqordıniəşebo, qınobəqiy bıəbo, 23 ın qıno bəçəy ıştəni oşko beədə bıdə qıləy beğusurə niyə bız ğırbon biyə. 24 Əv ıştə dasti bınə bızi səysə, əy obırnı Kulli-İxtiyori huzurədə – sutniyə ğırbon obırniyə vırədə. Im, qınoro ğırbone. 25 Çəyo kahin deştə anqıştə qınoro bıə ğırboni xunədə kamişi peqətı bo sutniyə ğırbononro bıə ğırbonqo şoxi dəsu. Xuni mandəy isə ekə bə həmonə ğırbonqo bınəmi. 26 Kahin həmonə həyvoni həmə piy unsiyətə ğırboni piy ğəzinə ğırbonqoədə bə duyəvuli bıjənı bısutı. Demiyən əv bo həmonə odəmi qınon kəffarə bıkə ki, əv baxşə bıbu.

27 Qirəm xəlğo bıə qıləy xonəxo nızne-nızne qıno kardəşebo, Kulli-İxtiyori ğədəğən kardə əmronədə qıləyni dəqordıniyəşebo, qınobəqiy bıbo, 28 ın qıno bəçəy ıştəni oşko beədə bıdə əv bəştə qınoro qıləy beğusurə moə bız ğırbon biyə. 29 Əv ıştə dasti bınə qınoro bıə ğırboni səysə, əy obırnı sutniyə ğırbon obırniyə vırədə. 30 Çəyo kahin deştə anqıştə ğırboni xunədə kamişi peqətı dəsu bo sutniyə ğırbononro bıə ğırbonqo şoxon. Xuni mandəy isə ekə bə həmonə ğırbonqo bınəmi. 31 Əv həyvoni həmə piy unsiyətə ğırboni piy bekarde ğəzinə bekə, ğırbonqoədə bə duyəvuli bıjənı bısutı. Im, bə Kulli-İxtiyori xoşomə buye. Jıqoən kahin bo həmonə odəmi kəffarə bıkə ki, əv baxşə bıbu.

32 Qirəm odəm qınoro pəs ğırbon vardeydəbo, bıdə ım beğusurə moə həyvon bıbu. 33 Ə odəm ıştə dasti bınə qınoro bıə ğırboni səysə, iyən ımi sutniyə ğırbonon obırniyə vırədə obırnı. 34 Çəyo kahin deştə anqıştə ğırboni xunədə kamişi peqətı dəsu bo sutniyə ğırbononro bıə ğırbonqo şoxon. Xuni mandəy isə ekə bə həmonə ğırbonqo bınəmi. 35 Ə odəm həyvoni həmə piy unsiyətə ğırbon bıə pəsi piy bekarde ğəzinə bekə. Kahinən ımi ğırbonqoədə bo Kulli-İxtiyori doəbıə sutniyə təğdimi səpe bə duyəvul bıjənı bısutı. Demiyən kahin həmonə odəmi qıno kəffarə bıkə ki, əv baxşə bıbu.