Kəşf bıkə

Xıdo Daqlə Əmr

20:1 Xıdo votışe həmə ın sıxanon: 2 «Iştı Kulli-İxtiyorə Xıdo Azim, bekardıme tı Misiro, çə məmləkəto ki, tı əyo ğul biş.

3 Ğərəyz Bəmı ıştı co xıdonı nıbu.

4 Məsoxt boştə hiç qıləy bıt, nə pentono – osmonədə, nə jitono – zəminisə, nəən jiyədəzəmini bıə ovonədə bıəyon hiç qıləyni surətədə. 5 Bı jıqo çiyon səcdə məkə, ibodət məkə. Oxo Az, ıştı Kulli-İxtiyorə Xıdo, ğıryətmandə Xıdom. Bəmı nifrət kardəkəsi pıə kardə qıno cəzo bəçəy se-ço nəsıli bədom kəşe. 6 Har kəsi ki bıpiyoşe Mıni, Bəçımı əmron əməl bıko, bəçəvon həzo-həzo nəsıli mehibbət nişo bəkardem.

7 Iştə Xıdo Kulli-İxtiyori nomi hədərə vırədə məkəş, oxo Az becəzo nıbahaştem Çımı nomi hədərə vırədə kəşəkəsi.

8 Şanbə ruji mığəddəs hisob bıkə, yodo beməkə. 9 Şəş ruj ko bıkə, ıştə həmə koon sə bıkə. 10 Əmma haftminə ruj Kulli-İxtiyorə Xıdo Şanbə ruje. Imruj tı ıştən, ıştı zoə, kinə, ğul, kəniz, həyvon, ıştı tono mandə açinən hiç qılə ko nıkə. 11 Oxo şəş ruji mıddətədə Kulli-İxtiyorə Xıdo ofəyəşe zəmin, osmon, dıyo iyən bəvonədə bıə har çiy, haftminə ruji isə Iştə dinci səşe. Bıçımiro Kulli-İxtiyori bə Şanbə ruji bərəkət doşe, mığəddəs hisob kardışe.

12 Bəştə pıə iyən moə hurmət bıkə ki, ıştı Kulli-İxtiyorə Xıdo bətı doə zəminədə dırozəji bıbi.
13 Ğətl məkə.
14 Zino məkə.
15 Dızdi məkə.
16 Bə hiç kəsi vəynə duyəvojə şoydəti məkə.
17 Bə hiç kəsi kəy tamə məkə. Bə hiç kəsi jeni, ğuli, kənizi, neqo, həy – bə hiç kəsi hiç çiy tamə məkə».

Xıdo tars

18 Həmə xəlğ osmonə qurrə, avəçəkə, şeypurə sədo məseədə, bando beşə duyəvuli vindeədə tarsiku dəmandin larze, diyəro şin çəvırəo. 19 Votışone bə Musa: «Tı qəp bıjən deyəmə, əmənən bıməsəmon. Bıdə Xıdo deyəmə qəp nıjənı, nekneki bəmardemon». 20 Musa votışe bə xəlği: «Mətarsən, Xıdo omə ki, şıməni dəvinə bıkə iyən Xıdo tars şımənədə bıbu ki, qıno məkən». 21 Xəlğ diyəroədə mande, Musa isə nez oməy bə toykiyə zılmoti, Xıdo zılmoti dılədəbe.