Kəşf bıkə

Məhsul veye, koəkon kamin

9:35 İsa səkuyeydəbe şəhron iyən diyon həmməy, çəvon sinaqoqonədə təlim omuteydəbe. Osmoni Podşoəti Şoyə Xəbə bəyon kardeydəbe, bə har curə noxəşi iyən mərəzi şifo doydəbe. 36 İntasi İsa izdihomi vindeədə rəhmış oməy bəvon, çumçıko bənə beqələvonə pəson betağət iyən beçarəbin. 37 Bəvədə İsa votışe bəştə şoqirdon: «Məhsul veye, koəkon isə kamin. 38 Bı səbəb bə məhsuli Soybi lovə bıkən ki, Boştə məhsuli qırdə kardeyro koəkon bıvığandı».

Bə Donzə şoqirdi doə bıə asbard

10:1 İsa sədo kardışe Donzə şoqird Iştə tono, mırdolə rufon səpe bəvon səlohiyət doşe ki, əvoni bıtojnın, bə har curə mərəzi iyən noxəşi şifo bıdən. 2 Jıqoy ım Donzə həvari nomon: iminəni Simonbe, bəy Peter nom doə bıəbe iyən çəy boə Andrey, Zavday zoə Yağub iyən çəy boə Yəhya, 3 Filip iyən Bartalmay, Tomas iyən doyənəqırdəəkə Mattə, Halfayi zoə Yağub iyən Tadday. 4 Kənanvona Simon iyən bə İsa xəyonət kardə Yəhudə İskaryot.

5 İsa vığandışe həmonə donzə kəs, asbardışe bəvon: «Məşən bə co xəlğon dılə iyən dəməşən bə Samariyəvıjon hiç qılə şəhr, 6 əmma bışən çe İsrailıjon tono, komqılon ki, çe Xıdo qin bıə pəsonin. 7 Bışən, bəyon bıkən ki, “Osmoni Podşoəti neze”. 8 Şifo bıdən bə noxəşinon, bəyji bıkən mardon, pok bıkən cuzaminon, bıtojnən cınon. Səyone həvoy, bıdən həvoy. 9 Iştə kıştiyədə nə ğızıl, nə nığə, nəən mısə pul peməqətən. 10 Bo roy, nə tumə, nə dıqlə şəy, nə şım, nəən ləvo peməqətən. Çumçıko koəkə bəştə ruzi loyiğe. 11 Bə kon şəhr, ya di dəşon, bınəvən əyo ləyoğətinə odəmi pəydo bıkən, de tosə dəro qıniye bımandən çəy kədə. 12 Bə kə dəşeədə bıvotən, “sulh bıbu bəşmə”, 13 qirəm kə loyiğ bıbo, bıdə şımə sulh bo çəy səpe; loyiğ nıbo, bıdə şımə sulh oqardı bəşmə. 14 Ki şıməni ğəbul nıko, şımə sıxanon nıməso, çə kəo, yaan şəhro beşeəsə ıştə lınqon qardiyən eşandən. 15 Rosti voteydəm bəşmə: Hıkmi Ruji Sodom iyən Homorrə hol həniyən hoston bəbe çə şəhri holisə. 16 Imha, Az şıməni pəsəvon ğəzinə vığandeydəm bə vağon dılə. Əve bənə mori mudrik, bənə kafte sof bıbən.