Kəşf bıkə

İsa hafto kəsi vığandeydə bo vəz karde

10:1 Çımi bəpeştə Kulli-İxtiyori təyin kardışe həniyən hafto kəs, vığandışe dıkəs-dıkəs Iştə navədə bə şəhron iyən diyon ki, Iştənən şey niyətədəbe bə vıron. 2 Əy votışe bəvon: «Məhsul veye, koəkon isə kamin. Əve əjo bıkən məhsuli Soybiku, bıdə Boştə məhsuli qırdə kardeyro həniyən koəkon bıvğandı! 3 Bışən! Imha, Az şıməni bənə pəsəvon vığandeydəm bə neçiyon arə. 4 Peməqətən deştə nə xırcin, nə tumə, nəən şım, roədə de hiç kəsiyən sıxan məkən. 5 Bə kon kə dəşon, sıftə bıvotən: “Sulh bıbu bı kədə bıəkəson!” 6 Qirəm bı kədə bə sulhi loyiğə inson jiyeydəbo, şımə sulh bəmande deəy, qirəm nıbo, bəvədə əv obəqarde bəşmə. 7 Bımandən bı kədə, çiç bınon şımə vədə bəhən iyən peşomən, çumçıko koəkə loyiğe bəştə mıjdi. Kəbəkə mənəvən. 8 Qirəm bə qıləy şəhr omənin bişon, ğəbul kardışone şıməni əyo, çiç bınon şımə vədə bəhən, 9 bə əyo bıə noxəşinon şifo bıdən iyən bıvotən: “Xıdo Podşoəti nez bıə bəşmə”. 10 Əmma bışon bə qıləy şəhr, əyo ğəbul nıkon şıməni, beşən bə kuçon jıqo bıvotən: 11 “Bı şəhrədə de bəçəmə lınqon dəçıkə qardiyən bəşmə vəynə eşandeydəmon. Əmma ımiyən bızınən: Xıdo Podşoəti nez bıə!” 12 Voteydəm bəşmə, Xıdo Hıkmi Ruji bo Sodomi həniyən hoston bəbe, çə şəhrisə!