Kəşf et

İsanın sınağa çəkilməsi

4:1 Bundan sonra Allahın Ruhu İsanı səhraya apardı ki, iblis Onu sınağa çəksin. 2 İsa qırx gün-qırx gecə oruc tutduqdan sonra acmağa başladı. 3 Elə bu vaxt iblis yaxınlaşıb Ona dedi: «Əgər Sən, doğrudan da, Allahın Səmavi Oğlusansa, bu daşlara əmr et ki, çörəyə dönsünlər». 4 İsa ona belə cavab verdi: «Tövratda yazılıb ki, insan yalnız çörəklə deyil, Allahın söylədiyi hər kəlmə ilə yaşayır».

5 Sonra iblis Onu müqəddəs şəhər olan Yerusəlimə gətirdi və məbədin ən yüksək yerinə qaldırıb dedi: 6 «Əgər Sən, doğrudan da, Allahın Səmavi Oğlusansa, onda Özünü aşağı at. Axı Zəburda yazılıb ki, Allah mələklərinə əmr edər, Səni qolları üstündə apararlar, ayağın bir daşa da dəyməz». 7 İsa ona dedi: «Tövratda yazılıb ki, Rəbb Allahınızı sınamayın».

8 Bundan sonra iblis İsanı çox uca bir dağın zirvəsinə qaldırdı. Ona dünyanın bütün padşahlıqlarını və onların cah-calalını göstərib dedi: 9 «Əgər Sən qarşımda əyilib mənə səcdə etsən, bütün bunları Sənə verəcəyəm». 10 İsa dedi: «Rədd ol, Şeytan! Tövratda yazılıb ki, yalnız Rəbb Allahınıza səcdə edin və yalnız Ona xidmət edin». 11 Bundan sonra iblis İsanı tərk edib getdi. Mələklər gəlib İsaya xidmət etməyə başladılar.