Kəşf et

Allahın İbrama çağırışı

12:1 Rəbb İbrama dedi: «Öz ölkəni, qohumlarını, ata evini tərk et, sənə göstərəcəyim torpağa get. 2 Nəslini artıracağam və sənin nəslindən böyük bir millət yaranacaq. Beləcə, sənə xeyir-dua verəcəyəm, adını ucaldacağam və bərəkət qaynağı olacaqsan. 3 Sənə xeyir-dua verənlərə xeyir-dua verəcəyəm. Səni lənətləyənləri lənətləyəcəyəm. Yer üzünün bütün millətləri sənin vasitənlə xeyir-dua alacaq».

4 İbram Rəbbin sözünə əməl edib yola düşdü; qardaşı oğlu Lut da İbramla getdi. Xarandan çıxanda İbram 75 yaşında idi. 5 Onunla birgə arvadı Saray, qardaşı oğlu Lut və bütün nökərləri də getdilər. İbram bütün əmlakını da özü ilə götürdü. Onlar Kənan ölkəsinə gəldilər. 6 İbram oranı dolaşıb Şekem şəhərinin yaxınlığındakı More palıdlığına gəldi. O zamanlar bu torpaqlarda Kənanlılar yaşayırdılar. 7 Rəbb İbrama görünüb dedi: «Bu torpağı sənin nəslinə verəcəyəm». İbram ona görünən Rəbbə ibadət etmək üçün orada qurbangah düzəltdi. 8 Sonra o, Bet-Elin şərqindəki dağlıq bölgəyə getdi və orada çadır qurdu. Bu yerin qərbində Bet-El, şərqində Ay şəhəri idi. İbram orada da bir qurbangah qurdu və Rəbbə ibadət etdi.

Allahın İbramla əhdi

15:1 Bir müddət sonra Rəbb İbrama görüntüdə bu sözləri dedi: «İbram, qorxma. Mən səni qalxan kimi qoruyuram. Mükafatın böyük olacaq». 2 İbram dedi: «Ya Rəbb Allah, mənə nə verəcəksən? Bir övladım yoxdur ki, varisim olsun. Mal-mülküm evimdə doğulan bu Dəməşqli Eliezerə qalacaq. 3 Mənə övlad vermədiyin üçün varisim evimin nökəri olacaq». 4 Rəbb İbrama dedi «O sənin varisin olmayacaq, öz doğma övladın sənin varisin olacaq». 5 Sonra Rəbb İbramdan çadırdan çıxmasını istədi və İbram bayıra çıxanda dedi: «Göyə bax, oradakı ulduzları saya bilərsənsə, say. Sənin nəslin də o ulduzlar qədər olacaq». 6 İbram Rəbbin sözünə güvəndi və Ona etibarına görə Rəbb İbramı saleh adam saydı.