Kəşf et

İbrahimin sınağa çəkilməsi

22:1 Bir müddət sonra Allah İbrahimi sınağa çəkməyi qərara aldı. Allah «Ey İbrahim!» deyə çağırdı. İbrahim «Bəli, ya Rəbb, buradayam!» deyə cavab verdi. 2 Allah dedi: «Sevdiyin yeganə oğlun İshaqı götürüb Moriya torpağına get. Orada sənə göstərəcəyim bir dağda oğlunu Mənə yandırma qurbanı olaraq təqdim et». 3 Səhər İbrahim qalxıb yandırma qurbanı üçün odun doğradı. Eşşəyini palanladı. Sonra oğlu İshaqı və iki nökərini də götürüb Allahın dediyi yerə yollandı. 4 Üç gün yol getdikdən sonra İbrahim uzaqdan həmin yeri gördü. 5 O, nökərlərinə dedi: «Siz burada qalın, eşşəkdə gözünüz olsun. Mən uşaqla orada Allaha ibadət edib qayıdacağam». 6 O, yandırma qurbanı üçün götürdüyü odunu İshaqın çiyninə qoydu. Özü isə çaxmaq daşı və bıçağı götürdü. Oğlu ilə yola düşdü. 7 İshaq İbrahimi çağırdı: «Ay ata!» İbrahim cavab verdi: «Buradayam, oğlum». Oğlu soruşdu: «Çaxmaq daşı və odun var, bəs yandırma qurbanı olacaq quzu haradadır?» 8 İbrahim dedi: «Oğlum, yandırma qurbanı olacaq quzunu Allah Özü göndərəcək». 9 Allahın dediyi yerə çatanda İbrahim qurbangah düzəltdi və odunları oraya düzdü. Oğlunun əl-qolunu bağlayıb odunların üstünə qoydu. 10 Oğlunu qurban kəsmək üçün bıçağı çıxaranda 11 Rəbbin mələyi göylərdən ona səsləndi: «İbrahim, İbrahim!» İbrahim «Mən buradayam!» dedi. 12 Rəbbin mələyi ona dedi: «Uşağa əl qaldırma və ona heç bir şey etmə. İndi bildim ki, sən Allahdan qorxan adamsan, öz yeganə oğlunu Məndən əsirgəmədin». 13 İbrahim ətrafına baxdı və buynuzu kol-kosa ilişmiş bir qoç gördü. Qoçu götürüb oğlunun əvəzinə yandırma qurbanı olaraq təqdim etdi. 14 İbrahim hadisənin baş verdiyi yeri Yahve-İre adlandırdı ki, bu da «Allah ehtiyaclarımızı qarşılayır» deməkdir.

15 Rəbbin mələyi göylərdən İbrahimə səsləndi: 16 «Rəbb bəyan edir: “Sən yeganə oğlunu məndən əsirgəmədin. Mən də söz verirəm ki, 17 sənə böyük xeyir-dua verəcəyəm. Nəslini göydəki ulduzlar, dəniz kənarındakı qum qədər artırıb çoxaldacağam. Nəslindən gələnlər düşmənlərindən ələ keçirdikləri şəhərlərdə yaşayacaqlar. 18 Yer üzünün bütün millətləri də sənin nəslinin vasitəsilə xeyir-dua alacaq. Bunu edəcəyəm, çünki əmrimə itaət etdin”». 19 Sonra İbrahim nökərlərinin yanına qayıtdı. Birlikdə Beer-Şevaya döndülər. İbrahim Beer-Şevada məskunlaşdı.