موندل

^١ زمونږ په پېغام باندې چا يقين کړې دے؟ مالِک خُدائ خپل قوت په چا ظاهر کړې دے؟ ^٢ د مالِک خُدائ په وړاندې زما خِدمت کوُونکې داسې وده وکړى لکه څنګه چې يو نرم تيغ په زمکه باندې جرړې نيسى. هغۀ څۀ شان شوکت او حُسن نۀ لرلو چې د هغې په وجه مونږ ورباندې پام کړې وے. او نۀ په کښې څۀ داسې کشش وو چې مونږ يې متاثره کړى وے. ^٣ خلقو هغۀ ته سپک وکتل او هغه يې رد کړو، هغه د درد او کړاو سره مخ شو. او خلقو به هغۀ ته دومره سپک کتل چې مخ به يې ترينه اړولو. مونږ د هغۀ هيڅ قدر نۀ کولو. ^٤ خو بې شکه چې، هغۀ زمونږ بيمارئ او کمزورئ اوچتې کړې. خو بيا هم زمونږ دا خيال وو چې هغۀ له سزا ورکړې شوه، او دا چې خُدائ پاک هغه ووهلو او د هغۀ د ګناهونه سزا يې ورکړه. ^٥ خو زمونږ د ګناه په وجه هغه زخمى شو، زمونږ د بغاوت په وجه هغه چخڼې کړې شو. چې کومه سزا ورکړې شوه نو د هغې په وجه مونږ ته شفا مِلاو شوه، هغۀ چې کوم وهل وخوړل نو د هغې په وجه مونږ روغ شوُو. ^٦ مونږ ټول د ورکو ګډو په شان وُو، مونږ د خُدائ پاک د لارې نه اوړېدلى وُو. هر يو کس په خپله مخه باندې روان وو. خو بيا هم مالِک خُدائ زمونږ د ټولو ګناهونه په هغۀ باندې واچول. ^٧ هغۀ باندې ظلم زياتے اوشو، خو هغۀ په خولهٔ باندې هيڅ هم ونۀ وئيل. لکه چې يو ګډُورے د حلالولو دپاره بوتلے شى، لکه چې يوه ګډه د وړۍ کلولو واله په مخکښې خاموش وى، نو هم هغسې هغۀ د خولې نه يوه خبره هم نۀ ويستله. ^٨ هغه په دروغه باندې مجرم وګرزولے شو او بوتلے شو. او هيچا د دې پرواه ونۀ ساتله چې هغه بې اولاده مړ شو، او هغه د ژوندو د زمکې نه لرې کړې شو. خو هغه زما د خلقو د ګناه په وجه ووژلے شو. ^٩ د هغوئ اراده وه چې د بدعمله خلقو سره يې ښخ کړى، خو هغه د مالداره سړى په قبر کښې کېښودلے شو، خو هغۀ هيڅ جرم هم نۀ وو کړې او نۀ يې څوک دوکه کړى وُو. ^١٠ خو دا د مالِک خُدائ رضا وه چې هغه ووهلے شى، او درد ورته مِلاو شى. کله چې د هغۀ ژوند د ګناه دپاره کفاره شى، د هغۀ به ډير اولاد وى. هغه به يو اُوږد عُمر تېر کړى، او د هغۀ په ذريعه به د مالِک خُدائ مقصد پوره شى. ^١١ کله چې هغه وګورى چې د هغۀ د مصيبت اوچتولو په وجه هغۀ څۀ حاصل کړى دى، نو هغه به مطمئن شى. زما صادق خِدمت کوُونکے به ډير خلق صادقان کړى، ځکه چې هغه به د هغوئ ګناه پورته کړى. ^١٢ نو زۀ به هغۀ له د عزت مقام ورکړم، او زۀ به هغۀ له د جنګ د لوټ مال ورکړم، ځکه چې هغه فاتح دے. هغۀ خپل ځان مرګ ته حواله کړو او هغه په باغيانو کښې حساب کړې شو. د ډېرو خلقو ګناه يې واخستله او د بدعملو د ګناه معافى يې وغوښتله.