Kəşf bıkə

Vəftizəvon Yəhya bo İsa Məsihi ro hozı kardeydə

3:1 Bə rujonədə Vəftizəvona Yəhya vəz karde-karde daşt Yəhudeyədə beşe bə məydon. 2 Əv jıqo voteydəbe: «Tobə bıkən! Çumçıko Osmoni Podşoəti nez bıə». 3 Im ə odəme ki, Yeşayə peyğəmbəri votəşbe çəy barədə:

«Car kəşəkəsi sədo omeydə daştədə:
“Hozı bıkən Kulli-İxtiyori roy,
Həmo bıkən Çəy omə roon”».

4 Yəhya dəvə paşməo olət tankardəşbe, bəştə peşti pustə kışti dəbastəşbe, çəy hardemon çəkurkə iyən daşti anqivinbe. 5 Yerusəlimi səbəson, cəmi məmləkət Yəhudeyə iyən ru İordani ətrofədə jiyəkəson həmməy omeydəbin Yəhya tono. 6 Əvon ıştə qınon bə qiy qəte-qəte deçəy vositə vəftiz bin ru İordanədə.

7 Yəhya vindeədə fəriseyon iyən sadukeyonb veyni bo vəftiz be omeydən çəy tono, jıqo votışe bəvon: «Ha qurzon nəsıl! Ki sərosniyeşe şıməni ıştə coni vəomə ğəzzəbiku peroxniye? 8 Esə boən bə tobə loyiğə bəhəron bıdən. 9 Iştə dılədə fikir məkən, məvotən “çəmə pıə İbrahime”. Az voteydəm bəşmə: Xıdo ğadire çı sığono fərzənd soxte bo İbrahimi. 10 Həni təvən hozıye doon bınədə. De jıqo, çokə bəhrə nıdoə har do bırniyə iyən şodoə beydə bə otəş.

11 Az şımə tobəro şıməni de ovi vəftiz kardeydəm, əmma çımı bəpeştə omə Şəxs çımısə həniyən Ğudrətine. Az loyiğ nim jıqo Çəy şımon kırniyero, Əv şıməni de Mığəddəsə Rufi iyən otəşi vəftiz bəkarde. 12 Çəy hiyə Çəy dastədəy, Əv Iştə xəməni pebəşande, Iştə taxıli bə ambo qırdə bəkarde. Kıləşi isə onıkışiyə otəşədə bəsute».

Çe İsa vəftiz kardə bey

13 Bə vaxti İsa çe Yəhya tərəfo vəftiz beyro oməy Qalileyəo bə ru İordan, Yəhya tono. 14 Yəhya piyəşe mane bıbu Bəy, votışe: «Tı Mıni vəftiz kardəniniş, Tı boçi oməş çımı tono?» 15 Əmma İsa cəvob doşe bəy: «Hələlığə rozi bıbi bımi. Çumçıko əmə, jıqonə bə vırə rosniəninimon salehəti koon». Bəvədə Yəhya rozi be. 16 İsa vəftiz bencə beşe ovo. Bə vaxti osmonon obin Çəy vədə, Əy vindışe Xıdo Ruf kafte şikilədə epərəy iyən nışte Çəy səpe. 17 Imha, qıləy sədo oməy osmonono: «Im Çımı azizqiromiyə Zoəy, rozim Çəyku».

Çe Yəhya şəhodət

1:29 Maşkinə ruji Yəhya vindeədə ki, İsa omeydə çəy tono, jıqo bəyon kardışe: «Çe dınyo qınoro ğırbon bıə Xıdo Pəsəvə ıme! 30 “Çımı bəpeştə qıləy Şəxs omeydə ki, Əv başe çımısə, çumçıko çımı bənav hestbe”. Imeha, ə Şəxs, az Çəy barədə qəp jəydəm. 31 Iştən Əy zıneydənıbim, əmma Çəy bə İsraili zahir beyro az oməym de ovi vəftiz bıkəm». 32 Yəhya şoydəti kardışe: «Vindıme ki, Ruf osmono bənə kafte epərəy mande Çəy səpe. 33 Iştən Əy zıneydənıbim, əmma de ovi vəftiz kardeyro mıni vığandəkəsi Iştən votışe bəmı: “Ruf çiki səpe epəro bımando, bızın ki, de Mığəddəsə Rufi vəftiz bıkə Əve”. 34 Azən vindıme iyən şoydəti kardıme ki, “Əve Xıdo Zoə”».