Kəşf bıkə

İblisi tərəfo İsa dəvinə kardə be

4:1 Çımi bəpeştə İsa de Rufi vositə bardə be bə daşt, iblisi tərəfo dəvinə kardeyro. 2 İsa çıl ruj-çıl şəv rujə qəte bəpeştə vəşi qəte. 3 Bəvədə dəvinəəkə nez oməy, votışe Bəy: «Qirəm Tı Xıdo Zoəşbu, əmr bıkə bı sığon peqardın bə nun». 4 İsa jıqo cəvob doşe bəy: «Jıqo nıvıştə bıə “İnson əncəx de nuni nıbəjiye, əmma əv Xıdo qəvo beşə de har kəlimə bəjiye”».

5 Çəyo iblisi vardışe Əv bə mığəddəsə şəhr Yerusəlim iyən noşe məbədi ən bılındə kumisə, 6 votışe: «Qirəm Tı Xıdo Zoəşbu, şodə Iştəni çıyo saru. Çumçıko jıqo nıvıştə bıə:

“Xıdo Bəştı xoto bəştə mələkon əmr bəkarde ki,
Iştə dastonsə bıbən Tıni,
Iştı lınq nıqını bə qıləy sıği”».

7 İsa jıqo votışe bəy: «Həmçinin nıvıştə bıə: “Dəvinə məkə Iştə Kulli-İxtiyorə Xıdo”».

8 İblisi ijən petotnişe İsa bə qıləy vey barzə band. Nişo kardışe Bəy çe dınyo həmə podşoətion iyən çəvon cəh-cəlol, votışe: 9 «Qirəm Tı eçıkoş bə zəmin bəmı səcdə bıkoş, ımoni həmmə bədom Bətı». 10 İsa votışe: «Rədd bıbi, Şəyton! Nıvıştə bıə: “Bəştə Kulli-İxtiyorə Xıdo səcdə bıkə, əncəx Bəy ibodət bıkə”».

11 Çımi bəpeştə iblis esiyəy İsaku iyən mələkon oməyn xıdmət kardeydəbin Bəy.