Kəşf bıkə

Adəmi iyən Həvo bə qıno dəşe

3:1 Kulli-İxtiyorə Xıdo ofəyə daşti həyvonon dılədə həmməysə hiləqor morbe. Mori votışe bə jeni: «Roste ki, Xıdo votəşe bəşmə “boğədə bıə hiç qılə doy mivonədə məhən?”» 2 Jeni votışe bə mori: «Boğədə bıə doon bəhərono harde bəzınemon. 3 Əncəx boği miyonədə bıə doy mivon barədə Xıdo votəşe: “Məhən çəvo iyən məqınən bəy, neysə bəmardeşon!”» 4 Mori votışe bə jeni: «Ne, əslo nibəmardeşon. 5 Bərəks, Xıdo zıneydə ki, həmonə mivono hardə ruji şımə çəşon obəben, bənə Xıdo bəbeşon çoki iyən bevəci bəzıneşon». 6 Jen bəne çoke bo harde çı doy mivə, çok çiyeydə bə çəşi iyən ın do dərrokə doyro cəlb kardeydə insoni. Əve əy çınişe həmonə mivəo, hardışe. Çəyo doşe bəştə tono bıə şuyən, əyən hardışe. 7 Bə vaxti çəvon dıynənən çəşon obəyn, ıştə qucili be zınəşone. Əve omunişone bəyəndı inciyə doy livon, boştə fitə tumo kardışone.

8 Əvon məsəşone əvəlihanqom boğədə nəvə Kulli-İxtiyorə Xıdo sədo; əve Adəm iyən çəy jen Kulli-İxtiyorə Xıdo huzuro boğədə bıə doon arədə niyo bin. 9 Kulli-İxtiyorə Xıdo sədo kardışe Adəm, votışe: «Koncoş?» 10 Əy cəvob doşe: «Məsəme boğədə ıştı sədo tarsəym, qucilibim əve niyo bıəm». 11 Kulli-İxtiyorə Xıdo votışe: «Ki votışe bətı ki, quciliş? Hardəni ki Çımı bətı harde ğədəğən kardə doy mivəo?» 12 Adəmi votışe: «Demı bə ivırə beyro Iştı bəmı doə jeni doşe çə doy mivəo, azən hardıme». 13 Kulli-İxtiyorə Xıdo votışe bə jeni: «Tı boçi jıqo karde?» Jeni votışe: «Mori bekardışe mı roo, azən hardıme».

14 Kulli-İxtiyorə Xıdo votışe bə mori:
«Tı ımi kardeyro
Həmə soy həyvonon iyən kəfşəni həyvonon dılədə
Lənət ğəzənc kardeydəş.
Bəfırseş ıştə luzisə,
Xok bəhardeş ıştə həmə umri dırozi.
15 Az deşmenəti eğandeydəm
Bəştı iyən jeni arə,
Bəştı balə iyən bəçəy fərzəndi arə
Im fərzənd bəje bəştı sə,
Tınən bətıkneş əy poşnəo».

16 Çəyo Kulli-İxtiyorə Xıdo votışe bə jeni:
«Əğılbəbolo beədə bətı
Vey əzyət bədom,
Doji dılədə bəzandeş ıştə əğılon.
Həmrəğ bəbeş bəştə şuyə,
Əv bətı əğəti bəkarde».

17 Çəyo Kulli-İxtiyorə Xıdo votışe bə Adəmi:
«Bəştə jeni sıxani quş doyro,
Çımı ğədəğən kardə, “mivədə məhə” votə
Doy mivəo hardeyro
Iştı hıcubətədə lənət beydə bə zəmini.
Iştə umri dırozi de zəhməti
Zəmino hard bə dast bəvardeş.
18 Əv botı teğ iyən şəlol pebərosne,
Tınən kəfşəni aləfon bəhardeş.
19 Deştə təvili aki nun bəhardeş.
Oxoyədə obəqardeş bə zəmin,
Çumçıko çəyo peqətə bıəş,
Bə səbəb ki, zəmini xokiş,
Bə xokən obəqardeş».

20 Adəmi noşe ıştə jeni nom Həvo,a çumçıko əv zəmini dimisə jiyəkəson həmməy moə be. 21 Bəvədə Kulli-İxtiyorə Xıdo tumo kardışe bo Adəmi iyən bəçəy jeni pusto olət, tankardovnişe bəvon.

22 Çəyo Kulli-İxtiyorə Xıdo votışe: «Imha, insoni zınəşe çoki iyən bevəci, bənə çəməhono qıləyni be. Bıdə esə dıroz nıkə ıştə dasti, nıçını nəhə jimoni doy mivəo iyən zol nıjiyı!» 23 Kulli-İxtiyorə Xıdo bekardışe inson boğ Edeno ki, əv kaştıqıl bıkə çəy ıştəniyən peqətə bıə zəmini. 24 Kulli-İxtiyorə Xıdo tojnişe inson. Əy noşe bə boğ Edeni şərğ ıştə keruvon iyən bə har tərəf qardə otəşinə ğılınc ki, bə jimoni doy şə roy hıvos bıkən.