Kəşf bıkə

23:32 De İsa ivrədə dıqlə caniyən bo kışte bardışone. 33 Bə Kəllə nomədə bıə vırəy rəseədə bə çomex kəşəşone Əv iyən həmon caniyon, qıləyni Çəy rostədə, qıləyniyən Çəy çəpədə. 34 Əmma İsa voteydəbe: «Pıə! Bıbaxş əvoni, çumçıko zıneydənin çiç kardeydən». Əvon de pışki Çəy oləton ıştə arədə baxş kardışone.

35 Xəlğ mandəbe, təmşo kardeydəbe. Deyəvon bə ico rəisonən de rışxandi voteydəbin: «Co kəson peroxneydəbe, qirəm Əv çe Xıdo səçın kardə Məsihebu, bıdə Iştəni peroxnı». 36 Sərbozonən bə ləğ noydəbin Əy. Əvon nez oməyn, edaştışone Bəy tırşə şərov, 37 votışone: «Qirəm Tı Yəhudiyon Podşoş, peroxın Iştəni». 38 Jıqo nıvıştəy hestbe Çəy səyku: «Çe Yəhudiyon Podşo Ime». 39 Çomexo ehaştə bıə caniyon qıləyni kufr kardeydəbe Bəy: «Məqər Tı Məsih niş? Iştəniyən, əməniən peroxın!» 40 Əmma ə qılə cani sə-sıxan kardışe bəy: «Tı Xıdoku hiç tarseydəniş? Oxo tı ıştənən bə eyni cəzo məhkum kardə bıəş! 41 Əmə de ədoləti məhkum kardə bıəmon, çumçıko bəştə əməlon loyiğ cəzo səmone, əmma Əy hiç qılə bevəcə ko kardəşni». 42 Əy votışe bə İsa: «Ya İsa, Deştə Podşoəti omeədə mıni bə yod biyə!» 43 İsa votışe bəy: «Rosti voteydəm bətı: ımruj tı Demı ivrədə behiştədə bəbeş».

Çe İsa marde

44 Təğribən bəruj saat donzəku tosə peçoştə saat se zılmot darşiyəy həmə zəmini dimisə. 45 Həşi ruşnə okıriyəy. Məbədi pardə miyono dı poə be. 46 İsa de barzə sədo nido kardışe: «Ha Pıə, Iştə rufi Bəştı dast doydəm!» İsa votışe ın sıxanon, doşe oxonə nəfəs.

47 Imoni vində sərsa izzət doşe bə Xıdo votışe: «Həğiğətən ım Odəm salehbe». 48 Bə təmşo omə izdihom ın ğəziyə vinde bəpeştə sinə jəy-jəy oqarde bə dumo.

49 İsa zınə odəmon həmməy iyən Çəy dumo Qalileyəo omə jenon mandəbin diyəroəco təmşo kardeydəbin bımi.

Çe İsa dəfn

50 Ali Şurə uzv bıə Yusif nomədə qıləy xəymandə iyən salehə merd hestbe əyo. 51 Əv rozi nıbe de Şurə ğərori iyən koy. Im odəm çe Yəhudeyə Arimateyə şəhrobe iyən Xıdo Podşoəti bə çəşbe. 52 Əv oməy Pilati tono, piyəşe çəyku çe İsa cəsəd. 53 Evardışe cəsəd çomexo, pepuştışe bə kəfəni, noşe hali dılədə kandə bıə ğəb ki, hələ hiç kəs dəfn kardə bıənıbe əyo. 54 Həmonə ruj Hozıəti rujbe.b Şanbə ruj dameydəbe.

55 De İsa Qalileyəo omə jenonən şin Yusifi dumo, vindışone ğəb iyən Çəy cəsədi bə ğəb noy. 56 Əvon oqardin oməyn bəştə kə, hozı kardışone ətrinə mazon iyən ruyənon. Şanbə ruji bə Tovrati mıvofiğ istırohat kardışone.