Kəşf bıkə

İnsonon royku beşe iyən ovbarz

6:1 İnsonon dəmandin zəmini dimisə vey be, çəvon kinon moəku bin. 2 Bəvədə Xıdo zoon bənen vey reçinin çe insonon kinon, ıştə bəqəm kardə kinə jen səçone boştə. 3 Kulli-İxtiyori votışe: «Çımı ruf zol nıbəmande insonədə, çumçıko əvon əncəx andomin. Çəvon umr sadı vist sor bəbe».

4 Həmonə dovrədə dıjdə odəmona zəmini dimisə jiyeydəbin, Xıdo zoon insonon kinon jen sə iyən çəvon fərzəndon bə dınyo omə dovriku hestbin əvon. Imon ğədimə dovri ğəhrəmonə iyən nom-sandinə odəmonbin.

5 Kulli-İxtiyori vindışe ki, veyin çe zəmini dimisə bıə insonon şərə əməlon iyən har vaxti bə bevəci səbəro beydən çəvon dılonədə bıə fikron iyən niyəton. 6 Kulli-İxtiyor pəşimon be ki, soxtəşe insonon dınyoədə iyən ğərəğəydi qəte ıştə dılədə. 7 Kulli-İxtiyori votışe: «Bəmolem zəmini dimiku Iştə ofəyə insonon, ımi bəvardem de insonon bə ivırə, bə həyvononən, luzəfırs kardəyonən iyən pərəndonən sə, çumçıko Az pəşimon bıəm ki, soxtəme əvoni». 8 Əncəx Nuhi lutf pəydo kardışe Kulli-İxtiyori çəşədə.

9 Jıqoy Nuhi tarıxçə: Nuh salehə iyən ıştə nəsıli dılədə benoxsanə qıləy odəmbe. Əv de Xıdo şeydəbe. 10 Nuhi beşe seqlə zoə: Sam, Ham iyən Yafəs. 11 Əncəxən çe Xıdo huzurədə dınyoədə bıə insonon iştə royku beşəbin iyən dınyo pur bıəbe de zori. 12 Xıdo vindışe, zəmini dimədə bıə insonon beəxloğ bıən, dınyoədə bıə həmə bəşəri dəqijniyəşe ıştə ro.

13 Xıdo votışe bə Nuhi: «Çımı vədə bıə həmə bəşəri oxoy rəsə, çumçıko dınyo pur bıə deçəvon zori. Əve Az de dınyo bə ico məhv bəkardem əvoni. 14 Boştə tumo bıkə qıləy qəmi qoferəb doo, tumo bıkə otağon çəy dılədə, ğıy bıjən bəçəy səpe dılətono iyən bentono. 15 Qəmi jıqo tumo bıkə: sesa qəzc çəy dırozi, penco qəz çəy hovuji, si qəzən bıbu çəy bılındi. 16 Qəmi səpeku i qəz saru pencə okəyş iyən yano bınəyş çəy bəy. Qəmi se mərtəbəş bıbu: qıləyni jiyədə, qıləyni miyonədə, qıləyniyən səpe.

17 Diyəkə, Az zəmini dimi de ovəyzə ovi ğərğ bəkardem ki, osmonon jiyədə jimonə nəfəs bıə həmə coninon məhv bıbun iyən zəmini dimisə bıəyon həmməy bımardın. 18 Əncəx Iştə əhdi detı dəbasteydəm. Tı deştə zoon, jeni iyən vəyuon bə ico pebənışteş bə qəmi. 19 Penşandiş bə qəmi həmə həyvonono, coninə məxloğono qiti – niyə iyən moə ki, səğ bımandın detı bə ivırə. 20 Səğ bımandın votəynə, bəştə curon mıvofiğ pərəndon, həyvonon iyən zəminisə luzəfırskardəyon har qıləyniyədə qiti bome ıştı tono. 21 Həmçinin peqət deştə har curə zımhor, qırdə bıkə ıştə tono ki, bıbu ıştı iyən çəvon hard».

22 Nuhi kardışe har çiy: çoknə Xıdo əmr kardəşbe bəy, jəqoən əy rosnişe bə vırə.

7:1 Kulli-İxtiyori votışe bə Nuhi: «Tı dəşi bə qəmi deştə xıyzoni həmməy, çumçıko ım bəşəri nəsıli dılədə əncəx tıni saleh vindıme Iştə vədə. 2 Peqət deştə har pokə həyvoni niyə iyən moəo haft qit, har mırdolə həyvoni niyə iyən moəo i qit. 3 Həmçinin peqət osmoni pərəndon niyə iyən moəo haft qit, bıdə bıjiyı çəvon nəsıl həmə zəmini dimisə. 4 Çumçıko haft ruji bəpeştə Az voş bədom voye bə zəmin çıl ruj-çıl şəv iyən məhv bəkardem Iştə soxtə coninon həmməy zəmini dimədə». 5 Nuhi bə vırə rosnişe har çiy, çoknə Kulli-İxtiyori əmr kardəşbe bəy. 6 Nuhi hestışbe 600 sin zəmini dimisə ovbarz beədə. 7 Nuh, çəy jen, zoon iyən vəyuon ivrədə penıştin bə qəmi ki, perəxın ovbarziku. 8 Pokə həyvonon iyən mırdolə həyvonon, pərəndon iyən həmə zəminisə luzəfırskardəyon 9 niyə iyən moə qılon, qit-qit oməyn Nuhi tono dəşin bə qəmi, çe Xıdo bə Nuhi əmr kardə ğəzinə. 10 Haft ruji bəpeştə ovəyzi ovon ru bin bə zəmin. 11 Bə vaxti – Nuhi umri 600 sori, dıminə manqi havdəminə ruji de tovi peqıləyn nığıliyədə bıə həmə yolə ovə səvonon iyən obəyn osmoni pencon. 12 Çıl ruj-çıl şəv voş voəy bə zəmini dim.

13 Hejo həmonə ruji Nuh, çəy jen, çəy zoon Sam, Ham, Yafəs iyən çəy seqlə vəyu penıştin bə qəmi. 14 Deyəvon ivrədə dəşin bə qəmi har curə kəfşəni həyvon, har curə soy həyvon, zəminisə luzəfırskardə, osmonədə pərə har curə conin iyən har curə pərəndon: 15 qit-qit oməyn Nuhi tono, dəşin bə qəmi həmə coninon. 16 Çe Xıdo bə Nuhi əmr karde ğəzinə həmə coninon niyə iyən moə qılon dəşin bə qəmi. Kulli-İxtiyori edoşe çe qəmi bəçəvon dumo.

17 Çıl ruj ovbarz be zəmini dimisə iyən ov ziyod be, rost kardışe qəmi zəminiku sape. 18 Ov vey sape rost be, eqətışe zəmini dim, qəmi dəmande ovi dimədə bo sınov jəy. 19 Ovi jıqo qətışe zəmini dim ki, bə ov ğərğ bin osmonon jiyədə bıə həmə barzə bandon. 20 Ov ponzə qəz rost be çe bandon bəşonsə, edoşe əvon. 21 Məhv bin zəmini dimisə hərəkət kardə coninon həmməy – pərəndon, soy həyvonon, kəfşəni həyvonon, zəminisə luzəfırskardəyon iyən həmə insonon. 22 Hışkiədə jiyə, bukədəş jimoni nəfəs bıə coninon həmmə mardin. 23 Kulli-İxtiyori məhv kardışe zəmini dimisə bıə həmmə bəyjiyon: insononku tosə həyvonon, luzəfırskardəyon iyən osmoni pərəndon; məhv be zəmini dimədə har çiy. Əncəx Nuh iyən deəy bə ico qəmiyədə bıəyon səğ mandin. 24 Ovi hıkmronəti kardışe zəmini dimədə sadı penco ruji dılədə.

Ovbarzi oxoy

8:1 Xıdo bə yod vardışe Nuh iyən deəy bə ico qəmiyədə bıə həmə kəfşəni həyvonon iyən soy həyvonon. Xıdo vavaz vığandışe bə zəmini dim, ov dəmande bo kam be. 2 Bastə bin nığıliyədə bıə ovə səvonon iyən osmonon pencon, voş omande. 3 Ov de fatxəşi okıriyəy zəmini dimo, sadı penco ruj dəvardə bəpeştə ov kam be. 4 Qəmi mande Araratə bandonədə haftminə manqi havdəminə ruji. 5 Ov okıriyəy tosə daminə manqi, bandə bəşon çiyəyn daminə manqi iminə ruji.

6 Nuhi okardışe ıştə tumo kardə qəmi pencə, çıl ruji bəpeştə 7 vadoşe qıləy lo; lo pərəy şe səkuyəşe har tərəf zəmini dimədə tosə ovi hışk be. 8 Nuhi bı səfə vadoşe qıləy kafte ki, bızını ovi zəmini dimo okıriyəy-onıkıriyəy. 9 Əmma kafte nıznəşe pəydo karde nışteyro qıləy rohatə vırə oqarde bə qəmi – çəy tono, çumçıko hələ ov hestbe həmə zəmini dimədə. Nuhi dıroz kardışe ıştə dast qətışe kafte bardışe əv bə qəmi – ıştə tono. 10 Əy çəş kardışe həniyən haft ruj iyən vadoşe kafte qəmiyo. 11 Şanqovəsəy kafte oqarde çəy tono. Çe kafte tıkədə tojə zeytunə livə hestbe. Nuhi zınəşe ki, ov okıriyə zəmini dimo. 12 Əy çəş kardışe həniyən haft ruj ijən vadoşe qıləy kafte, həni kafte onıqarde çəy tono.

13 Nuhi umri şəşsa iminə sori, iminə manqi iminə ruji ov hışk be zəminisə. Nuhi rost kardışe qəmi əyvonə, vindışe ki, zəmini səpe bıə ov hışk bıə. 14 Dıminə manqi vistı haftminə ruji zəminisə bıə ov qırd hışk be.

15 Xıdo votışe bə Nuhi: 16 «Tı deştə jeni, zoon iyən vəyuon bə ico beşən qəmiyo. 17 Bekə bə benton detı bıə həmə bəyjiyon – pərəndon, həyvonon iyən zəminisə luzəfırskardəyon. Bıdə pevılo bıbun bə zəmini dimi, pevatə iyən heyve bıbun zəminisə». 18 Nuh beşe qəmiyo deştə jeni, zoon iyən vəyuon bə ico. 19 Bəştə cinsi qorə dastə-dastə tərq kardışone qəmi həmə həyvonon, luzəfırskardəyon, pərəndon iyən zəminisə jiyə həmə bəyjiyon.

20 Nuhi bo Kulli-İxtiyori tumo kardışe qıləy ğırbonqo. Əy peqətışe har curə pokə həyvononədə iyən pokə pərəndonədə, edaştışe əyo sute ğırbon. 21 Bə Kulli-İxtiyori rost be xoşə bu çımiku, Kulli-İxtiyori votışe ıştə dılədə: «Diyə məkə ki, cohilətiku jıqo insoni dıli fikron hejo yavəy, i kərən insoni hıcubəto lənət nıbəkardem bə zəmini dimi. İ kərən məhv nıbəkardem bənə esətnə həmə bəyjiyon.

22 Dınyo çanə bımandı
Kaştıqıl, tati-sard,
Tovıston-zımıston iyən şəv-ruj
Nıbərəse bə oxoy».

Çe Xıdo bə Nuhi vəd

9:1 Xıdo bərəkət doşe bə Nuhi iyən bəçəy zoon votışe: «Pevatən, heyve bıbən iyən etənən zəmini dimi. 2 Şıməku bətarsen bə dəhşət bomen hışkiədə bıə həmə həyvonon, osmonədə bıə həmə pərəndon, zəminisə luzəfırskardə həmə coninon iyən dıyoədə bıə həmə moyon. Əvon doə bıən bəşmə ixtiyor. 3 Boşmə hard bıbun həmə coninonən, əvoni həmməy doydəm bəşmə bənə havzə aləfon. 4 Əncəx qujdi məhən deçəy con bıə xuni bə ivırə. 5 Çəy əvəzi hukman bəstem qirəm şımə xun ekardə bıbo. Bəstem har həyvoniku şımə əvəzi. Həmçinin insoniku – əvəzi bəstem ıştə boə coni sə har kəsiku.

6 Ki eko insoni xuni,
Çəy xunən ekardə bəbe
De insoni dasti.
Çumçıko Xıdo soxtəşe inson
Bəştə surəti qorənə.
7 Şımə pevatə iyən heyve bıbən
Pevılo bıbən bə zəmini,
Heyve bıbən əyo».

8 Xıdo votışe bə Nuhi iyən deəy bıə bəçəy zoon: 9 «Az Iştə əhdi basteydəm deşmə iyən şımə peşonə nəsıli, 10 de qəmiyo beşə zəmini dimisə bıə həmə coninə məxloğon – pərəndon, soy həyvonon iyən həmə kəfşəni həyvonon. 11 Deşmə noydəm Iştə əhdi ki, həni i kərən de ovbarzi məhv nıbəben həmə bəyjiyon iyən hiç vaxt nıbəbe zəmini dimi viron kardə ovbarz». 12 Xıdo votışe ijən: «Ime Çımı deşmə iyən deşmə bıə həmə coninon nəsılbənəsıl zol bastə əhdi əlomət: 13 noydəm Iştə haftranqə avədə ki, bıbu Demı iyən zəmini arədə bıə əhdi əlomət. 14 Az bə zəmini dim avə vardeədə, avədə bəçiye haftranqə. 15 Bəvədə Az bə yod bəvardem Çımı deşmə iyən de həmə coninə məxloğon iyən de bəşəri bastə əhdi. Ovon i kərən penıbəqarden bə ovbarz, məhv nıbəkarden həmə coninon. 16 Haftranqə bəbe avədə. Az bəvindem əy, bə yod bəvardem Iştə de zəmini dimədə jiyə həmə bəşəri bastə zolə əhdi». 17 Xıdo ijən votışe bə Nuhi: «Ime Çımı de zəmini dimədə jiyə həmə bəşəri bastə əhdi əlomət».