Kəşf bıkə

Çe Xıdo bə İbrami hele

12:1 Kulli-İxtiyori votışe bə İbrami: «Beşi ıştə zəmino, ıştə avlodon arəo, pıə kəo, bışi Çımı bətı nişo doə bə zəmin. 2 Iştıku obəfəyem qıləy yolə millət, bərəkət bədom bətı, barz bəkardem ıştı nomi iyən bəbeş bərəkəti səvon. 3 Bərəkət bədom bə bətı bərəkət doəkəson, lənət bəkardem bə bətı lənət kardəkəson. Deştı vositə bərəkət bəsten çe zəmini dimi həmə tobyon».

4 İbram beşe çəyo Kulli-İxtiyori bəy vote ğəzinə. Lutən şe deəy ivrədə. İbram hafto penc sinədəbe Xarano beşeədə. 5 İbrami peqətışe ıştə jen Səray, boəzo Lut, ıştə həmə əmlok iyən ıştə Xaranədə bıə həmə nokon, dəro qıniye bə zəmin Kənani tərəf. Əvon oməyn bə zəmin Kənan. 6 İbram ovaşte çəyo, rəsəy bə şəhr Şekemi nezi bıə bə More şimşori nezi. Bəvədə Kənanıjon jiyeydəbin bı zəminədə. 7 Kulli-İxtiyorçiyəy bə İbrami votışe: «In zəmini bədom bə ıştı nəsılo bıə odəmi». İbrami bəy çiyə Kulli-İxtiyoriro tumo kardışe əyo qıləy ğırbonqo. 8 Çıyo dəro qınye bə Bet-Eli həşipemədə bıə bandı-kuyə vırə tərəf, soxtışe iyoçodı. Bet-El çe çodı həşinıştədə, şəhr Ay isə çəy həşipemədəbe. İbrami əyoən soxtışe bo Kulli-İxtiyori qıləy ğırbonqo iyən sədo kardışe Kulli-İxtiyordeçəy nomi.

Çe Xıdo de İbrami əhd

15:1 Mıddəti bəpeştə çiyemonədə nozil be Kulli-İxtiyori ın sıxan bə İbrami: «İbram, mətars. Azim ıştı sipər. Iştı mıkofot vey yol bəbe». 2 İbrami votışe: «Bəmı çiç bədoş, ha Xıdovanda Kulli-İxtiyor? Çımı nime fərzənd, çımı kəy xıvand bəbe ım Dəməşğıjə Eliezer». 3 İbrami dəvom kardışe bə sıxani: «Tı bəmı fərzənd nıdoyro çımı kəy nokə bəbe çımı varis». 4 Kulli-İxtiyori ın sıxan nozil be bəy: «Əv nıbəbe ıştı varis, ıştı ıştən peşto omə fərzəndı bəbe ıştı varis». 5 Kulli-İxtiyori bekardışe əv bə benton votışe: «Diyəkə bə osmoni, başmard qirəm bıznoş aşmarde əyo bıə astovon». İjən votışe: «Anə bəbe ıştı nəsıl». 6 İbrami bovə kardışe bə Kulli-İxtiyori, Kulli-İxtiyori salehəti zınəşe ım bəy.