Kəşf bıkə

İbrahimi dəvinə karde

22:1 İ mıddəti bəpeştə Xıdo dəvinə kardışe İbrahim. Əy «Ha İbrahim!» votışe, sədo kardışe. İbrahimi «İyom!» votışe. 2 Xıdo votışe: «Peqət ıştə piyə iqləliyə zoə İsaği, bışi bə zəmin Moriya. Əyo edaşt ıştə zoə sute ğırboni ğəzinə, çımı bətı nişo doə bə bandədə». 3 Maştə rəbədə İbrahim əşte bə palən kardışe ıştə hə. Peqətışe deştə dıqlə nokə iyən ıştə zoə İsağ. Əy petoknişe ezım bo sute ğırboni iyən dəro qıniye bə Xıdo votə vırə. 4 Seminə ruji İbrahim pedyəsəy diyəroəco vindışe ə vırə. 5 Əy votışe bəştə nokon: «Şımə bımandən iyo de həy, az bəşem əyo deştə zoə. Səcdə bəkardemon, obəqardemon şımə tono».

6 İbrahimi peqətışe ezım bo sutə ğırboni, noşe ıştə zoə İsaği amisə, ıştən isə peqətışe otəş iyən çəxu. Əvon şin bə ivırə. 7 İsaği sədo kardışe ıştə pıə İbrahim: «Ha pıə!» Əy cəvob doşe: «İyom, çımı zoə». İsaği votışe: «Otəş iyən ezım heste, bəs sutə ğırbon bıəninə və koncoye?» 8 İbrahimi votışe: «Çımı zoə, Xıdo Iştən hozı bəkarde sutə ğırbon bıəninə vəy». Əvon şin bə ivırə.

9 Çəyo oməyn Xıdo bə İbrahimi nişo doə bə vırə. İbrahimi tumo kardışe əyo qıləy ğırbonqo, dəçınişe ezımon iyən dəbastışe ıştə zoə İsaği dast-poçə noşe əv ğırbonqoədə ezımon səpe. 10 İbrahimi dıroz kardışe ıştə dast peqətışe çəxu bo ıştə zoə səy obırniye. 11 Kulli-İxtiyori mələki sədo kardışe əv osmonono: «İbrahim, İbrahim!» Əy votışe: «Az iyom!» 12 Mələki votışe: «Dast rost məkə bə əğıli, hiçi məkə bəy. Esə zınəme ki, tı tarseydəş Xıdoku; muzayiğə nıkarde ıştə iqləliyə zoə Çımıku». 13 İbrahimi rost kardışe ıştə sə, vindışe ıştə peştonədə şoxonış bə kuli pepuşiyə qıləy ğoç. İbrahim şe peqətışe ə ğoç, edaştışe ıştə zoə əvəzi sutə ğırbon beyro. 14 İbrahimi nom doşe bə vırəy Yahve-İre a bı səbəb tosə esə jıqo votə beydə: «Kulli-İxtiyori bandədə bəçiye». 15 Kulli-İxtiyori mələki ijən sədo kardışe İbrahim osmonono votışe: 16 «Kulli-İxtiyorbəyon kardeydə: “Ğəssəm hardeydəm Bəştə hestemoni ki, tı ın koy karde iyən ıştə iqləliyə zoə muzayiğə nıkardero 17 Az bədom bətı yolə bərəkət, vey ziyod bəkardem ıştı nəsıli osmonon astovon iyən dıyokənoədə bıə ğumi ğədərədə. Iştı nəsıl bəqəte ıştə deşmenon şəhron. 18 Dınyo həmə xəlğon bərəkət bəsten ıştı nəsılo, çumçıko tı quşı doy Bəçımı sıxani”». 19 Çəyo İbrahim oqarde ıştə nokon tono iyən əvon əştin şin bə Beer-Şeva. İbrahim jiyəy Beer-Şevadə.