Kəşf bıkə

Bo Pasxə idi təlimot

12:1 Əyo Misirədə beədə Kulli-İxtiyori votışe bə Musa iyən Haruni ın sıxanon: 2 «Bıdə ın manq boşmə sori manqon dılədə iminə iyən ən vocibə manq bıbu. 3 Bə İsrailıjon həmməy bıvotən: bıdə çı manqi daminə ruji har kəs boştə kəy xıyzoni iqlə pəsəvə peqətı. 4 Qirəm xıyzonədə odəm kame, iqlə pəsəvə harde əzınibo, bıdə deştə nezə hamsiyə bə ico i qılə pəsəvə peqətın, odəməsə, har kəsi harde zıne ğədərədə çəvon arədə baxş bıkən. 5 Şımə peqətə pəsəvə beğusur, niyə iyən i sornə həyvon bıənine, pəsəvə əvəzi, bızən peqəte bəbe. 6 Əy de tosə ın manqi çordə perosnən, bıdə həmonə ruji şanqovəsəy İsrailıjon həmməy obırnın ın həyvoni. 7 Həyvoni xuni peqətın, kon kədə ki əy baharden bə həmonə kəy kəybon yani çərçivon iyən bərəsimi dəsuyın. 8 In qujd həmonə şəvi hardə bıənine, əy obıştın otəşisə, de behəmyozə nuni iyən telə havzə bəhən. 9 Əy kol-koli, yaan ovədə məqılvonən məhən, deçəy kəllə-poçə iyən ləvəruyə bə ico otəşisə obıştən bəhən. 10 Bo maştənə oməqətən, çiç bımandoən, maştəvo əy otəşədə bısutən. 11 Jıqo bəhən əy: ıştə kışti dəbastən, məşon pobıkən iyən dastələvon peqətən bə dast, tadibəsə bəhən əy. Im Kulli-İxtiyori Pasxə İde.

12 Az, esə boy, həmon şəvi Misiri zəmino dəbəvardem, bəkıştem əyo bə dınyo omə iminəvəçə zoon iyən həyvonon iminələvə balon. Misiri həmə xıdon mıhokimə bəkardem. Az Kulli-İxtiyorim. 13 Şımə kəon səpe dəsuyə bıə xun əlomət bəbe. Az bə Misiri cəzo doədə xuni vindencə şımə kəonku yan dəbəvardem, hiç qıləy bəlo əvoni boşmə. 14 Bıdə ımruj boşmə xotirə ruj bıbu iyən əy id bıkən bo Kulli-İxtiyori. Nəsılbənəsıl qıləy zolə ğaydə ğəzinə id bıkən əy.

Behəmyozə Nuni İd

15 Haft ruj behəmyozə nun bəhən. Lap iminə rujiku rədd bıkən həmyozi ıştə kəono. Ki iminə rujiku tosə haftminə ruji həmyozinə nun baho, əv tojniyə bıbu İsrailıjon arəo. 16 Iminə iyən haftminə ruj mığəddəsə ruj bıbu. Bı rujonədə hiç qılə ko karde əbıni, har kəs əncəx ıştə xorəki hozı karde bəzne. 17 Bı Behəmyozə Nuni İdi bəçəyro rioyət bıkən ki, məhz bı rujədə Az dastəbədastə bekardıme şımə Misiri zəmino. Zolə ğaydə ğəzinə nəsılbənəsıl bı ruji rioyət bıkən. 18 Iminə manqi çordəminə ruji şanqonəku de tobə həmon manqi vistı iminə ruji şanqonə behəmyozə nun bəhən. 19 Haft ruj həmyoz nıbu şımə kəonədə, çumçıko ki həmyozinə nun baho, açinə odəm, yaan çıvırəyjə odəm, har kəs tojniyə bıbu İsrailıjon arəo. 20 Həmyozinə hiçiy məhən, konco bıjiyoşon behəmyozə nun bəhən».

İminə Pasxə İd

21 Musa sədo kardışe İsraili həmə sipirişon, votışe bəvon: «Bıvıjnən peqətən boştə xıyzoni mığobilədə pəsəvəon iyən Pasxə ğırboni obırnən.

22 Peqətən i çanqə zufa aləfi, qıləy ğabədə dəxısnən əy xuni dılədə, xuni dəsuyən bəştə kəybon bərəsimi iyən yani taxton. Tosə maştə hiç kəs benışu ıştə kəo bə benton. 23 Kulli-İxtiyor bə Misirıjon cəzo doyro omeədə kəybon bərəsimədə iyən yani taxtonədə bıə xuni vindeədə çə kəybəku yan dəbəvarde. Nıbahaşte Məhvəkə dəşu bəşmə kə bo kışte. 24 Şımə iyən şımə fərzəndon zolə ğaydə ğəzinə hejo bımi rioyət bıkən. 25 Keynə ki rəseşon Kulli-İxtiyori bəşmə vəd kardə zəmini, Bəçəy votə bı ğaydə rioyət bıkən. 26 Şımə əğılon şıməku bıparson: “In ibodəti məno çiçe?” 27 jıqo cəvob bıdən: “Im Kulli-İxtiyori Pasxə ğırbone, çumçıko Kulli-İxtiyor bə Misiri cəzo doyədə İsrailıjon kəonku yan dəvarde”». Xəlğ enəməy səcdə kardışe. 28 Kulli-İxtiyori çoknə votəşbe bə Musa iyən Haruni, İsrailıjon şin jəqoən kardışone.